Falta di duna preferencia a provoca accident fuerte na Savaneta

ORANJESTAD (AAN): Diadomingo anochi riba caminda principal di San Nicolas pa Playa, un poco pabao di Mariniers Kazerne na Savaneta a registra un accidente di trafico cu herido.

   Central di Polis mesora a manda unidad di San Nicolas pa e lugar.  E patruya a yega, y bin topa cu un Hyundai Accent color blanco cu number A-21783 cu hopi daño na e parti atras, y ta riba acera dilanti e cas Savaneta 349-B.  Esaki ta como 20 meter pabao di Better Day Supermarket.

   Mas pabao dilanti cas Savaneta 349-A, a bin topa riba caminda un Kia Rio hatchback color shinishi cu number A-26588 cu mayoria daño material na e parti dilanti.

   A bin sali na cla cu e Hyundai Accent a sali for di e parkinglot di e Supermarket, subi caminda pa bay pabao, sin duna preferencia na e Kia Rio cu ta bin di pariba.  El a subi caminda y core slow, pues e Kia Rio a bay dal violentamente den e Hyundai.  Den e impacto cu a produci un sonido basta fuerte, e ocupante di e Kia Rio a resulta herida y mester a ricibi atencion medico. 

  Caminda a wordo cera un rato pa desvia trafico y asina tanto polis y Paramediconan por a traha trankilamente.

   E chauffeur herida di e Kia Rio a wordo transporta pa Servicio di Emergencia na Hospitaal, mientras su auto a wordo hala un banda door di polis.