Exitoso tabata e Dia di Piscado riba Diadomingo na Hadicurari

ORANJESTAD (AAN): Riba Diadomingo 29 di Juni, tabatin un gran celebracion y alavez torneo di Pesca, pa asina observa oficialmente e “Dia di Piscado”.

   E ta un actividad cu anualmente Centro di Pesca Hadicurari hunto cu Santa Rosa ta organiza.  For di mainta trempan prome cu solo a sali, ya caba cantidad di Piscado tabatey ta preparando nan boto y nan material pa pesca.

   Y el a bira un dia fenomenal, y Piscadonan a goza un mundo di e competencia.  Tambe tabatin competencia pa e “Pot di Boto Grandi” pa categoria grandi.

   En total 26 boto a contribui na e pot aki, y e premio a bira e ora 1.300 Florin pa Categoria Grandi.  Pa Categoria chikito, tabatin 7 boto cu a participa y esey su premio a bira 350 Florin.

   En conexion cu Dia Internacional di Piscado, Minister di Sector Primario, Geoffrey Wever a bishita un grupo di piscado durante e torneo di pesca di Hadicurari pa honra nan dedicacion y ta reafirma su compromiso pa fortalece e sector pa generacionnan di futuro.