Exitoso programa pa yuda hendenan local y emigrante desaroya nan negoshi

ORANJESTAD (AAN): Recien tabatin un programa pa yuda guia comunidad, specialmente esnan cu a emigra pa Aruba,

pa desaroya nan idea di negoshi.  Esaki a bira conoci como ‘Emprende-RV en Aruba’, y a un programa cu a combina “Entrepreneurship” pa nan siña diseña nan propio negoshi usando e tecnologia di Realidad Virtual.  Tambe ‘Asesoria Legal” pa ricibi informacion y guia pa habri un negoshi y e operacion y cumplimento fiscal.  El a inclui tambe ‘Apoyo Emocional’ cu sesion guia emocional pa sa con pa atende cu retonan y sigui construi un futuro na nan bienestar.

   E programa cu a cuminsa dia 21 di januari, a termina Diabierna dia 24 di Januari y e programa a ser duna na sede di Aruba Lions Club.  Meta di e programa ta pa brinda e participantenan e conocemento necesario pa cuminsa y maneha un negoshi.

   E iniciativa aki ta conta cu apoyo di IREX ,Young Leader of the Americas Initiative (YLAI) den colaboracion cu Second Chance.  E programa aki ta parti di e mision di SAMU First Response cu ta pa sirbi comunidad, special migrantenan.