Exitoso fiesta di fin di aña cu e piscadornan local

ORANJESTAD (AAN): Na e final di e aña aki, tabatin un encuentro pa celebra mas cu solamente e transcurso di tempo.

A celebra e dedicacion na un ofishi cu ta basa profundamente den tradicion y necesidad, un ofishi cu ta conecta comunidad cu lama y ta sostene bida.

   Ministro Ursell Arends tabata presente, y el a splica cu hopi storia por a tende di Aruba su piscadonan y sigur ta di admira nan tenacidad, cu den cara di reto, e marduganan y anochinan laat cu boso ta bataya cu elementonan di naturalesa... pa trece "catch" di dia.

   Tambe a honra 5 di Aruba su baluarte piscadonan pa nan tremendo contribucion na e industria di pesca. A honra Nel Maduro, Ruben Willems, John Laurens, Claudio Wolff, y Ronnie Dania. Nan ta encarna e spirito di determinacion y perseverancia cu sigur nos antepasadonan por ta orguyoso di dje.

Boso trabao no solamente ta yena nos tayonan, pero tambe ta stimula nos comunidad, manteniendo e tradicion y cultura bibo.

   Mientras nos ta despedi e aña aki y yama 2024 bon bini, laga nos carga cu nos e lesnan siña for di lama: E habilidad pa adapta, pasenshi y e importancia di traha hunto pa un meta comun. Paso di nos banda, nos ta kere firmemente cu maneho ta worde traha den pueblo y cu pueblo. Danki pa boso conocemento y experiencia comparti durante e ultimo aña aki. Mi ta aprecia esaki masha. Y danki tambe na Fundacion Centro di Pesca Hadicurari pa a organiza tremendo fiesta.