Exitoso evento di Exprodesk a hala atencion di hopi empresario local

ORANJESTAD (AAN): Diabierna a tuma lugar na Hilton Aruba Caribbean Resort, e apertura di e evento ‘Reaching New Frontiers’,

organiza pa Departamento di Asuntonan Economico, Comercio y Industria pa medio di su unidad Exprodesk y segun maneho economico di Minister di Economia, Comunicacion y Desaroyo Sostenibel, Sr. Geoffrey Wever.

   Na e ocasión aki, a invita tur empresario local y (futuro) exportadornan pa atende evento, cu asina a conmemora e di 5 aña di existencia di Exprodesk, cu lo enfoca riba informacionnan practico y extenso pa e participantenan riba ‘haci negoshi’ cu e mercadonan den Norte America, Europa, Caribe y Asia.

   E evento aki ta pa esnan cu tin interes den amplia nan negoshi den futuro riba mercadonan internacional. Esnan cu kier combersa cu expertonan for di e mercadonan di Norte America, Europa, Caribe y Asia riba oportunidadnan comercial, y esnan cu kier haya mas informacion di productonan traha na Aruba.

   Pa medio di charlanan y despues e sesionnan Business2Business, esnan presente a haya informacion general y personaliza di expertonan comercial, empresarial, huridico, logistico y mas.

   Oradornan local y internacional tabata Manuel Pila (experto mercado Norte America), Michelle Low Chew Tung (experto mercado Asia), Taiana Mora-Ramis (experto mercado Republica Dominicana), Soelan Daal (experto mercado Europa), Sam Kruiner (experto mercado Caribe), Lay Hing de Kort-Yee y Frits Israel (expertonan riba exportacion).

   Pues awor mas cu nunca, porta ta habri pa comerciantenan na Aruba cuminza exporta nan producto.  Pesey den e Ballroom tabatin un ‘marketplace’ tambe di negoshinan local cu a demostra nan productonan produci riba e isla mes.