Exitoso conferencia di trabou di 'No Mas No More' na Sint Maarten y St. Eustatius

ORANJESTAD (AAN): Di 8 pa 12 di juni 2026, miembronan di e grupo di trabou No Mas No More (NMNM) a reuni na Sint Maarten y Sint Eustatius pa nan conferencia  di trabou anual.

 E conferencia a trece hunto representantenan di Aruba, Bonaire, Curaçao, Saba, Sint Eustatius, Sint Maarten, y e ministerionan Hulandes di Salubridad, Bienestar y Deporte (VWS), Enseñansa, Cultura y Ciencia (OCW), y Husticia y Seguridad (JenV). E meta tabata pa fortifica e cooperacion den combatimento di violencia domestico y maltrato di mucha.

Durante e siman, participantenan a traha riba topiconan manera e futuro ratificacion y implementacion di e Tratado di Istanbul, ordu  di prohibicion temporal, cooperacion entre islanan  pa sosten di victima y deteccion trempan di factornan di riesgo relaciona cu violencia basa riba genero. Ademas, e participantenan a traha riba acuerdonan pa un sistema comun pa colecta dato riba tur isla na un miho manera.

E participantenan a bishita varios organisacion na Sint Maarten y Sint Eustatius. Nan a bishita organisacionnan local manera Shelter pa Hende Muhe, Servicio di Sosten pa Victima y Voogdijraad pa siña tocante iniciativanan local. Tambe tabatin un intercambio special entre e grupo di trabou di NMNM y e Grupo di Consulta Multidisiplinario (MDO) di Sint Eustatius, caminda nan a haña bista riba con organisacionnan local ta colabora y coordina  casonan.

Pa Carmen Grefte (Presidente di NMNM)  y Ereina Hunt-Gorden (representante di Sint Eustatius), e conferencia a enfatisa e balor di uni profesionalnan pa crea un asercamento den henter Reino contra violencia domestico y maltrato di mucha.

No Mas No More ta un grupo di trabou di Reino cu ta promove cooperacion entre e seis islanan den Caribe y Hulanda pa preveni y atende cu violencia domestico y maltrato di mucha.