Evento grandi pa recauda fondo pa Torneo di Futbol 4x4 y tambe Kickball

Diasabra awor na Centro Deportivo Franklyn Bareño

• Asina ta yuda team U12 Elite di ASA bay pa Miami Soccer Cup 

ORANJESTAD (AAN): Cu yudansa di pueblo, lo por yuda pa asina hunto logra soño di Team ASA Elite U12 pa por participa den Miami Soccer Cup International y pone Aruba su nomber un biaha mas na halto.

   Pa haci e viahe aki posible, ta organisando un dia di actividad pa recauda fondo, y esey lo bay ta Diasabra 27 di April 2024, esta riba Dia di Rey.

   E evento lo bay ta na Compleho Deportivo Franklyn Bareño na Piedra Plat, y lo consisti mainta di un Soccer Tournament 4x4 na cual lo tin participacion di 30 team. Lo bay tin 6 veld, 12 referees, team di ASA Elite mes lo ta assist na veld y tambe den cushina.  ASA 4x4 soccer tournament, lo bay ta pa tur mucha edad 4-6, 7-9, 10-12 y 13-15.

   E competencianan ey lo bay ta for di 8:00 am te cu 1:00 pm.

   Pa e ganadornan di cada categoria lo tin premio manera Inter Miami CF outfits, un luna gratis di participa den Aruba Soccer Academy, y un tremendo actividad riba lama.  Tur e participantenan lo ricibi nan medaya.

   Atardi pa 4:00 pm lo bay tin ‘Kickball Tournament’ cu ta un reto pa esnan di 18 aña bay ariba.  E evento aki tambe ta pa yuda recauda fondo pa e viahe.

   Pa e Kickball Tournament, lo cobra suma di 100 Florin pa team.  Teamnan cu por participa ta e.o. companianan local, esnan di Hotel, cuido, famia, amigonan, djis forma un team di Kickball y participa.  Pa inscribi pa e Kickball Tournament bay na e website:

www.bit.ly/kickbala

   Pues Diasabra riba Dia di Rey, lo bay tin hopi actividad na Centro Deportivo Franklyn Bareño pa asina recauda fondo pa ASA Aruba Soccer Academy haci viahe pa Miami posible.

   Bo por pasa mira weganan, y disfruta di e bar y cushina bon surti, y cu animacion di MC Oz.

   Djis corda cu tur e placa cu ser recauda ta worde usa pa cubri e gastonan di cada hungador pa representa e isla den e torneo na Miami.