Evento di "World Press Freedom Day 2025" a lanta dialogo riba futuro di periodismo den era di AI

ORANJESTAD (AAN):  Den cuadro di 'World Press Freedom Day 2025', Aruba National Commission for UNESCO,

Red Arubiano di Prensa Profesional (RAPP), y Universidad di Aruba a organisa un evento significativo y inspirador cu a pone e futuro di periodismo den centro di atencion, specialmente den contexto di AI y su impacto riba medionan di comunicacion na un isla chikito maneraAruba.

            Bao e tema “The Future of Journalism in the Age of Artificial Intelligence”, e evento a reuni periodista, profesionalnan trahando den media, academico y experto den maneho pa dialoga riba e desafionan y e responsabilidadnan creciente cu ta periodismo moderno ta enfrenta.

            Dos presentacion hopi interesante a keda presenta pa dos experto reconoci:

Melissa Stamper, periodista investigativo freelance y co-fundador di RAPP, cu su trabou ta inclui contribucion pa This American Life, NTR Caribisch Netwerk, y Antilliaans Dagblad. Melissa ta un defensor firme di prensa independiente y miembro di Oxford Climate Journalism Network.

            Devid Ilievski, docente na Vrije Universiteit Amsterdam, specialista den AI y su rol den educacion y transformacion digital den newsroom. Su investigacionnan y asesoramento pa media startup y medionan tradicional a contribui na un estudio premia riba e futuro di periodismo.

            Un panel dinamico cu participacion di bosnan local y regional a agrega profundidad na e discusion, mientras cu un receptie di networking a duna oportunidad pa conecta y intercambia idea entre 'changemakers' den mundo di periodismo na Aruba.

            E temanan principal discuti a inclui:

- Conservacion di integridad di informacion den un mundo maneha pa AI

- Rehabilita y fortalece confiansa publico den prensa

- Sigura resiliencia di prensa local den transformacion digital acelera

            E evento a sirbi como plataforma crucial pa pone riba agenda publico e importancia di periodismo responsabel y sostenibel, den cara na e cambio tecnologico.