Entrante Diadomingo lo adapta check-in time pa pasaheronan cu ta viaha pa Merca

Cambio den schedule di ‘Passenger Flow Control’ na Aeropuerto

ORANJESTAD (AAN): Manera informa door di Aruba Airport Authority N.V. (AAA), e compania cu ta maneha y opera Aeropuerto Internacional Reina Beatrix (AUA Airport), desde 1 di December 2021, tur pasahero biahando pa Merca lo worde duna acceso na e terminal di check-in basa riba gruponan mara na cierto codigonan di color como parti di “Passenger Flow Control”.

   Adaptacionnan nobo a worde haci mirando cu e orario na Merca lo cambia (daylight savings time) entrante 13 di Maart, 2022. E orario pa check-in pa e grupo cu color GEEL awor a worde adapta pa check-in entre 8:00 am ~ 11:00 am.

   E orario pa check-in pa e grupo den e color BLAUW tambe a worde adapta y awor e grupo ey lo worde emiti pa check-in entre 11:00 am y 1:00 pm.

   E color ORANJE a worde cambia di entre 1:00 pm y 3:00 pm.

   E concepto di Passenger Flow Control ta ensera cu pasaheronan lo worde permiti pa drenta e check-in terminal basa riba gruponan separa cu nan codigo di color (Geel, Blauw y Oranje) cu a worde determina a base di e orario di salida di e buelonan. Pasaheronan lo haya un tempo pre-determina pa drenta e check-in terminal manera indica den e tabelnan aki.

   E tempo pre-determina aki lo worde determina pa bishitantenan basa riba e informashon cu nan indica den e ED (Electronic Disembarkation) Card na yegada. Aki e horario di buelo di salida lo mester worde indica.

   Residentenan biahando for di Aruba pa Merca lo mester wak e orario di e salida di nan buelo pa determina ki ora nan lo ta permiti pa cuminsa e proceso di check-in (no mas prome cu 3 ora prome cu e buelo sali).

   Aruba Airport lo tin embahadornan trahando na e terminal di check-in Mericano pa activamente controla e tempo pre-determina pa check in pa cada pasahero. Pasaheronan cu yega mucho trempan lo mester warda pafo pa por drenta ora nan orario yega.