Magaly Brito di SEPPA:
ORANJESTAD (AAN): Den un entrevista recien cu DIARIO, señora Magaly Brito di SEPPA a expresa cu enseñansa merece hopi mas inversion. El a duna di conoce cu mescos cu na nivel mundial ta mira inversionnan grandi ta tumando luga den enseñansa, na Aruba tambe mester procura cu e inversionnan den educacion sigui mehora cada aña.
Un di e areanan cu merece mas atencion ta tecnologia. Brito a señala cu mundo ta avansa rapidamente y cu tecnologia ta bira cada biaha mas importante den scolnan. Muchanan di awendia ta crece den un ambiente digital y ta uza tecnologia den nan bida diario. El a remarca cu muchanan di awendia no ta mescos cu esnan di antes. Nan ta custumbra cu tecnologia y, y si esaki no ta disponibel den klas, por crea frustracion. Esaki por tin un efecto negativo riba nan educacion y motivacion.
El a reconoce cu durante e ultimo añanan a haci inversionnan den enseñansa na Aruba, incluyendo inversion den docentenan, sea tiki of hopi. Sinembargo, segun Brito, den añanan prome, gobiernonan a keda corta den e sosten necesario pa sector di enseñansa, a kita di docentenan, incluyendo e “taakuren”.
“Tur esaki no solamente a desmotiva docentenan, pero tambe tin su efecto riba educacion di nos hobennan.
Brito a agrega cu inversionnan pa mehora no mester ta solamente pa docentenan, sino pa tur otro trahador di sector publico cu diariamente ta percura pa funcionamento di pais sigui cana. Segun e, inversion ta necesario, entre otro, den salario, condicion di trabou y siguridad di trahadornan y comunidad. Tambe mester dedica atencion na siguridad den e institucion penitenciario y den siguridad di nos propio gobernantenan.
“Tin hopi otro trabou den sector publico cu ta tene man cu otro cu merece y mester di inversion awo”, señora Brito a enfatisa.
