ORANJESTAD (AAN): Kenna F. Hernández a entrega un ehemplar di su buki ‘Los diez encantos’ na biblioteca nacional.
‘Los Diez Encantos’ ta un historia cu ta combina eventonan real cu elementonan di ficcion pa atrae y entretene e lesado.
E publicacion aki ta na Spaño. Inspiracion pa skirbi e buki ta su mesun bida personal, e biahenan cu el a haci, e cosnan cu el a wak y e parti romantico cu el a pasa aden.
'Los diez encantos' ta un novela na spaño di ficcion pero inspira riba hechonan real. E ta explora tema di amor, crecimiento personal, memoria a base di reflexion cu un structura narrativo. E ta un obra literario contemporaneo cu ta sigui un personahe principal, kende ta relfexiona riba topico di amor, memoria y transformacion personal durante un biahe largo prome cu e yega na su aventura. E ta reflexiona di e pasado cu a bira un les y un presente impredecibel cu personahenan cu lo haci cambio den su bida.
Kenna su soño ta pa inspira hubentud pa lesa mas y amplia nan horizonte via literatura. Pa pone historia disponibel den varios idioma, e ta spera di contribui na fuente educativo cu ta conecta cu un audiencia diversifica y multilengual. “Tempo mi tabata chikito, mi tabata lesa hopi buki na Ingles, Hulandes, Spaño y Papiamento. Y mi a cuminsa skirbi di chikito”. Kenna su aspiracion ta pa sigui studia literatura. Ela caba su estudio Ingles y ta traha como docente. Kenna a lanta na Aruba y algun aña pasa a bay biba na Hulanda. Kenna su pasion ta skirbi historia cu por conecta hende atraves di cultura y idioma. Su meta ta pa pone mas literatura disponibel pa hubentud di Aruba y rond mundo, specialmente na idioma cu no ta representa hopi, manera Papiamento. Su proximo obra 'Bek den pasado' ta casi cla y esaki ta na Papiamento.
Kenna su carera profesional a cuminsa den periodismo na Aruba. Un momento emocionante den su trayecto literario ta donacion di un copia di su buki na Biblioteca Nacional Aruba. "E ta nifica hopi pa haci un entrega di mi prome buki pa asina otro hoben por lesa y inspira nan mes, y sigui cu nan logronan, pa por contribui na obranan literario di Aruba."
"Pa publica den Papiamento ta importante y un balor special pa motibo cu e ta sigi enrikece literatura Arubiano den nos idioma propio."
Kenna ta sinti cu publicacion, tanto na Papiamento, Ingles, Hulandes y Spaño, lo sigui aporta na desaroyo di literatura na Aruba y motiva generacionnan nobo pa conta storia.
"Mi lo sigi trata cu amor, dedicacion y determinacion pa enseñansa y literatura di Aruba pa contribui na cultura y idioma.”
