Un homenahe na e mannan mas valioso den silencio di dolor
*Nan mester entrega nan mes ora ciencia perde tur opcion
*Nan entrega por bira e milager na momento crucial pa hende
ORANJESTAD (AAN) — Enfermeria ta uno di e trabounan cu no ta haya e recompensa cu e merece?
Prome cu tur hende cuminsa grita cu no tin placa, ban papia di e recompensa mas grandi cu por duna un hende, cu ta e forma cu ta admiti e rekisitonan mas importante cu un hende mester reuni pa e por traha como enfermero.
Progreso tecnologico a trece posibilidadnan nobo pa e mundo medico y paramedico, cu por cierto ta un palabra cu casi no ta wordo uza ora ta papia di e luchadornan mas grandi cu por tin na frontera ora tin guera, den biento di horcan, na sitio di desastrenan humano y den camber cera, enfrentando hende na e momento mas vulnerabel den bida.
Sea cu nos kier acepta of no acepta, tin trabou den bida cu mester di mas cu solamente estudio. Tin trabou cu mester di loke nos ta yama vocacion, cu ta haci cu hende ta pone su mes y su interes na riesgo, pa e bira luchador pa e causa directo di un ser humano.
Hopi bez mundo no por mira e trabou di un heroe, cu merece e titulo di heroe pasobra e ta lubida su mes pa e por yuda otro hende enfrenta peliger, dolor hasta morto.
Cuanto biaha den bida nos no ta cana drenta un establecimento y ta topa cu e participacion cu e trahador na e momento no por atende cu ningun hende pasobra ta su ora pa e come?
Tin profesion cu no por corda cu ta momento pa come, ora alarma wordo bati y cada seconde ta bira importante.
E situacion cu nan mester enfrenta, hopi bez ta kita nan hamber si nan haya oportunidad pa sinta of come den e lucha cu nan mester hiba pa atende cu dolor di un hende.
Kico ta ocashona dolor di un hende, di un pashent? Ban analisa esaki.
Laga nos no bay te na e momento final cu mester cruza rio di bida. Un persona cu a pasa den un susto di otro mundo, diripiente ta realisa kico tabata e peliger cu el a enfrenta.
E mester di un hende pa tene su man. Un hende pa dune un glas di awa. Un hende cu ta realisa cu e persona tin un problema di preshon di sanger y mester calma pa no causa problema grandi.
Un enfermero den nos tempo moderno, ta mas cu uno di e ekiponan mas costoso cu mester pa scapa bida.
E tin e conocemento pa actua ora e realisa cu tras di e angustia y panico di un persona, por tin un problema pa hala rosea.
E enfermero mester bira un diplomatico pa no haci e problema mas grandi.
Hopi biaha e enfermero durante su trabou, ta descubri sintomanan sumamente importante cu te ainda no a bini dilanti, pa anuncia cu e problema ta mas serio cu ta pensa.
E enfermero no por haci distincion den ningun persona ni nan forma di bida. E ta atende cu hende y e hende mas desprecia den un comunidad, ta hende cu e mester yuda.
E mester tuma e prome medidanan necesario mientras e ta pidi dokter pa bini.
Kico ta un enfermero?
Con splica e rayonan di tur color di solo prome cu cielo acepta scuridad di anochi?
Con analisa e man di un enfermero cu ta tene e man di un hende cu ta tembla den realidad di bida di cada hende na nan turno?
Cuanto biaha e aliento cu nan entrega na un pashent, ta yuda e pashent lucha y recupera?
E siman aki ta un siman special. E ta e siman pa yama danki y duna reconocimento na tur cu a acepta e reto pa traha como enfermero.
Pa ora tur hende ta drumi, nan topa cu Polis cu ta entrega nan hende herida den accidente. Hende cu cu gruponan di rescate a logra scapa di olanan di lama. Pa hende, cu bomberonan valioso a evita di muri den candela.
Nan a core pa duna prome asistencia na e victima cu bisiña cu curashi a scapa di man di atracador.
Nan ta pertenece na e heroenan di nos comunidad, cu durante e siman aki ta duna nan e homenahe cu nan merece y ta yama danki pa nan entrega cu por bira milager na un momento crucial!
