Empleadonan di Manchebo Beach Resort & Spa ta bay dilanti den salario cu 105 florin pa luna, 3 aña consecutivo

ORANJESTAD (AAN): FTA y e empleadonan di Manchebo Beach Resort & Spa a keda hopi contento despues di firma un CAO nobo Diamars mainta.

Vice Presidente di FTA Rudy Geerman durante un conferencia di prensa a trece dilanti cu e hecho cu FTA ta mas cu 30 aña caba cu Manchebo, ta bisa hopi di e bon relacion.

“Mester bisa cu durante e decadanan di relacion, nunca a bay asina leu cu e trahadornan por ehempel mester a bay den un accion”, segun Geerman.

El a splica cu ta trata aki di un CAO di 3 aña cu ta for di 1 di Januari 2022 te cu December 2024.

Un di e puntonan importante segun Geerman ta e aumento di contribucion pa loke ta gasto di bril pa e empleadonan.

“Tambe nos a logra cambia e bracket di vakantie”, segun Geerman kende a corda tur hende tambe riba e hecho cu algun tempo atras a logra pa e empleadonan di Manchebo no traha 6 dia mas sino 5, pero cu e salario cu ta cuadra cu 6 dia di trabao.

Un ehempel di e dianan di vakantie cu e empleadonan tin derecho riba dje ta cu si bo tin 4, 5 of 6 aña ta traha na e resort bo tin derecho riba 19 dia di vakantie, mientras cu si por ehempel bo tin entre 12 cu 15 aña ta traha eynan bo ta haya 26 dia di vakantie.

Esnan cu tin 16 of mas aña na Manchebo ta goza di 28 dia di vakantie tur aña.

“Nos a ahusta tambe e savings pa empleado”.

Unda cu Gobierno a pone 6% como e minimo pa companianan pone pa pensioen di nan empleadonan y esaki practicamente a bira un maximo, aki na Manchebo ya caba e ta na 8%, segun Geerman.

El a indica cu esaki ta un beneficio grandi pa e trahadornan pa ora cu nan bay cu pensioen.

Pa loke ta e aumento di salario esaki ta bay ta 3% pa aña y pa tur empleado sinti e aumento mescos, a wordo palabra cu pa e 3 añanan di e CAO nobo tur hende su aumento ta bay ta di mes cantidad di placa.

Pues tur empleado di Manchebo den e prome aña di e CAO ta haya un aumento di 105 florin pa luna, den e di dos aña e ta aumenta atrobe cu 105 florin y esey ta e caso un biaha mas den e di tres aña.

E aumento total den 3 aña ta bay ta 9%.