Edmarc Kock a gradua como Master of Science den Consultancy y Entrepreneurship

ORANJESTAD (AAN): Bon noticia ricibi for di Hulanda.  Aruba tin un otro hoben professional.

   Riba 26 di Augustus cu a pasa, Edmarc Kock un studiante Arubiano, a termina cu exito su Master of Science den Consultancy & Entrepreneurship na Rotterdam University of Applied Sciences.

   E tema di Edmarc su thesis a concentra riba expansion strategico cu un organizacion den e “Event and Entertainment Industry” por ehecuta y alaves sobrepasa obstaculo nan pa nan ta mas financieramente sostenibel pa un periodo largo.

   Durante su estudio na Hulanda, Edmarc a sigui un programa intensivo cu cursonan manera: Strategy & Innovation, Finance for Entrepreneurs and Consultancy, Funding, Digital Marketing, Responsible Business Management, Sustainable Reporting.

   Prome cu Edmarc a bay Hulanda, el a completa su Bachelor Degree na University of Aruba den e programa di Organization, Governance and Management (OGM). Reflexionando riba e logro grandi aki, Edmarc kier a expresa su gratitud na tur cu a yud’e:  “Mi kier gradici na tur hende cu a yuda y sostene mi durante mi añanan academico. E exito aki no ta solamente di mi, pero tambe di mi famia, mi pareha, amigonan, mentor nan y e comunidad di Aruba cu a keda na mi banda.”

   Cu logro aki, Edmarc kier inspira otro hobennan na Aruba pa sigui nan soñonan cu determinacion: “Sigui bo soño, no importa con leu e por parse, cu determinacion, fe y perseverancia, bo por logra bo meta nan”.

   Cu su fundamento na University of Aruba y awor cu un Master for di Rotterdam University of Applied Sciences, e lo ta cla pa contribui cu su experiencia y conocemento na e progreso positivo di Aruba den futuro.