ORANJESTAD (AAN): Como Presidente di Parlamento mr. Edgard Vrolijk ta indica cu e tin e deber y sigur esaki ta algo nobo,
pero necesario pa informa pueblo kico tur a ser haci pa mehora Parlamento, cu ta e organo mas halto den e structura constitucional di Aruba.
Teniendo na bista cu dia 13 di september 2022 lo ta apertura di Aña Parlamentario 2022-2023, unda lo mester scoge un Presidente di Parlamento di Aruba, ta na su lugar pa informa pueblo kico a ser logra den Aña Parlamentario 2021-2022.
E prome edicion lo dedica na transparencia y mehoracion di procesonan den parlamento y asina lo sigui informa pueblo den diferente edicion di e trabaonan haci y kico tin pendiente pa e añanan venidero.
Mas transparencia y percura pa procesonan cana mas lihe
Un di e criticanan di mas grandi cu a encontra tabata e falta di transparencia unda cu documentonan no tabata publico. Banda di esaki un otro critica tabata cu leynan ta keda pega y procesamento di leynan y documentonan cu ta drenta no tabata cana optimal. Sigur danki na un vision cla y cu cooperacion di trahadornan di Parlamento a percura, asina mes cu personal limita, pa documento cu ta publico ser poni riba website di Parlamento.
Banda di esaki a logra haal in tur retraso riba documento cu drenta Parlamento unda cu mesun dia cu esaki(nan) yega ta ser procesa pa nan yega cerca tur e Parlamentarionan. Danki na e mehoracion aki nos ta drenta di dos reces di Parlamento sin cu tin ley pendiente pa ser procesa y unda tur cos ta na ordo.
Den e siguiente edicion di “Presidente di Parlamento ta informa” lo enfoca riba automatisacion di entrada, reglanan nobo, codigo di conducta y Reglement van Orde nobo.
Pa mas informacion por subi riba Parlamento di Aruba su website na www.parlamento.aw of por bishita nan pagina di Facebook: ‘Parlamento di Aruba”.
