FIOT Aruba lo ricibi yudansa den cuadro di Landspakket
ORANJESTAD (AAN): Hunto cu Minister President, Minister Maduro di Finansa a cera conoci cu e team na cabes di e Fiscale Inlichtingen en opsporingsdienst (FIOD), cu ta e departamento di Belastingdienst di Hulanda cu ta encarga cu investigacion di fraude cu belasting.
Den cuadro di e implementacion di tema C4 di e Landspakket, FIOD Hulanda lo bay brinda sosten y cooperacion na e team di Fiscale Inlichtingen en opsporingsteam (FIOT) Aruba di Departamento di Impuesto (DIMP).
E team di FIOD Hulanda a consisti di sr. Nield Obbink, director general di FIOD, sr. Edo Edens, director di inteligencia y cooperacion internacional di FIOD y señora Helma Citroen kende ta e teamleider internacional di FIOD.
Na Aruba mescos cu rond di mundo, no ta tur hende ta contribui cu nan 'fair share' na caha di Gobierno y tin biaha ta busca manera nan creativo pa no cumpli cu nan deber fiscal. E team di FIOT na DIMP ta percura pa haci e investigacion necesario pa asina husticia na su turno por percura pa pone paro y condena e practicanan ilicito aki.
Minister Maduro ta spera cu lo por surgi un bon cooperacion entre FIOT Aruba y FIOD Hulanda na bienestar di Aruba.
