Director Rensley Mathilda:
ORANJESTAD (AAN): E conocido scol di EPB San Nicolas ta creciendo den forma positivo. Esey ta loke e director Rensley Mathilda a declara den un entrevista cu DIARIO. “Danki Dios cu te ainda nos tin e capacidad pa carga esey,” el a bisa.
Algun tempo pasa, EPB San Nicolas tabatin un promedio di 500 pico studiante. Segun Mathilda, pa e aña escolar 2021-2022 e scol a funciona cu 730 pico studiante.
Con e lo ta pa e siguiente aña escolar? Aki ta unda cu director Rensley Mathilda a splica cu tin indicacion cu e lo bay crece y e cantidad di alumno lo bira entre 800 y 820 studiante. Y pa awor, esey ta e capacidad mas responsable cu por mantene e scol tambe.
E cantidad ey ta uno caminda bo tin di tene cuenta cu diferente factor, hasta e disponibilidad di Busnan pa trece y busca e studiantenan. Fuera di esey tin di mira e grandura di e area unda mayornan individualmente ta busca e alumnonan.
Si bo sigui trece mas alumno, e ta pone presion tambe riba e trahamento di Rooster, y kizas lo tin di trece cambio na e facilidad existente di e scol cu ta situa den Caya Hose Geerman na San Nicolas.
E bunita ta cu hopi studiante ta escogiendo pa bay EPB San Nicolas, y esey ta loke e cabezante ta aprecia. Pasobra por analisa e cambio cu ta bini tambe, unda e alumno lo contribui na e cambio positivo cu ta crea. Den esaki e director ta desea participacion activo di e mayornan tambe, pa contribui cu nan granito di arena, duna sugerencia, y papia abiertamente cu directiva of docentenan di scol.
EPB San Nicolas ta tuma e filosofia cu scol mester ta igual cu bo cas, como cu bo ta pasa hopi ora di bo bida ta sigui les eynan y ricibi bo educacion.
Rensley Mathilda a bisa cu tin dos sector cu ta creciendo hopi mes na EPB San Nicolas, esta ‘Economie’ cu ta un estudio cu ta hopi gusta te ainda, tambe ‘Techniek’ cu ta parti di electro, y esun cu tin hopi alumno ta sigui, esta ‘Cushinamento’.
Pero e director a bisa cu lamentablemente tin un limite di alumno cu por tuma Cushinamento (igual di Techniek), pasobra tin e aspecto di seguridad cu e scol tin di keda mantene su mes na dje.
El a mustra por ehemplo cu si bo bay den sector di Bouw, unda e alumno ta traha cu machine pisa. Si acaso topa cu un fayo, bo no ta desea pa e alumno sufri lesion debi na esey. Esey ta conta tambe pa Cushina, unda cu no ta desea pa tin asina hopi hende pa haya lesion ora di prepara cuminda.
E reto mas grandi cu ta creciendo na EPB San Nicolas awor cu tin mas alumno, ta e.o. e sistema digital cu nan kier introduci, cual ta yama “A.B.O.”.
E ta un cambio fundamental con pa duna les, y tambe pa e studiante con e ta siña. Esey nifica cu e scol tin di prepara full e infrastructura y e ta bay costa tempo y energia, creatividad, pa por ta exitoso manera cu e scol ta awor. Pesey ta pidi companianan pa bin cu ideanan pa duna EPB San Nicolas un man den nan transformacion pa educacion digital.
