WILLEMSTAD: Corte di Prome Instancia na Curaçao a dicta e siman aki un sentencia den un caso sumario lanta contra Gobierno,
door di diez venezolano indocumenta cu tabata poni den aresto preventivo. Ta trata di seis homber y cuatro muher, kendenan no tin un permiso valido di estadia riba e isla. Nan a entabla e caso cu peticion pa pidi Huez laga nan den libertad.
E cuatro muhernan ya a wordo poni den libertad un poco prome cu e Caso Sumario a wordo trata, y pesey Huez mester a dicidi solamente riba e peticion di e seis hombernan.
E venezolanonan aki ta cera den ‘Arrestantencomplex Blok 1’ di Prison SDKK na Curaçao. A base di Articulo 5 di e Convencion Europeo pa Derechonan Humano, e lugar y e condicionnan di detencion di stranhero mester ta adecuado, y claramente mester por distingui nan for di un berdadero prison pa castigonan penal.
Corte na Curaçao a conclui, cu Blok 1 di Prison SDKK di Curaçao, en principio ta cumpli cu e condicionnan ey pa detencion di stranheronan.
Pero e reglanan cu Gobierno a impone riba e stranheronan deteni, a resulta di ta mas estricto compara cu e otro presonan cu ta sintando un castigo penal pa nan delitonan. A sali na cla cu e stranheronan aki deteni preventivamente, ta obliga pa keda 18 ora pa dia den un cel.
E celnan ta hopi smal y scur, y e luznan ta wordo cendi solamente entre 7:00 pm y 9:00 pm. E stranheronan venezolano tabata mag di sali pafo di e cel solamente seis ora maximo pa dia. Tambe durante e oranan ey, e stranheronan venezolano no tin ningun bista pa mundo di exterior, tin poco posibilidad pa recreacion, y ningun forma significativo pa pasa e dia, pues no ta pasa e dia den forma cu tin sentido.
Esaki ta completamente diferente cu e presonan cu ta encarcela pa castigo penal debi cu a comete delito. E presonan mes tin por ehemplo, un sporthal, un biblioteca, y werkplaats, y pesey tambe nan tin bista pa mundo exterior.
Corte ta condena e reglanan cu Gobierno ta impone riba e stranheronan venezolano aki, y tin prueba cu esaki ta pasando ya desde 31 di Mei 2022.
Huez ta haya cu Gobierno ta actuando di forma ilegal contra e stranheronan deteni. Pesey a duna ordo pa pone e personanan aki den libertad. Pa dos di e seis demandantenan, e libertad aki ta conta solamente si nan vuelo di deportacion planea pa 17 Juli 2022 lo no tuma lugar.
