E resort Secrets Baby Beach Aruba a yuda 30 mucha cu material di scol

ORANJESTAD (AAN): Aña Escolar nobo ta un momento cu semper alumnonan ta feliz y contento cu nan klas nobo y mas.

   E biaha aki, e resort Secrets Baby Beach Aruba a colabora cu Kiwanis Club of San Nicolas, pa asina sostene 30 alumno cu tur esencial cu nan mester di dje pa bay scol cu confiansa, y esey a inclui material di scol, tas pa scol, y tambe nan tromchi.

   Pero nan envolvimento a bay mucho mas leu cu djis donacion.  Nan a adopta cinco Kleuterschool den San Nicolas, y a crea un experiencia special di “Welcome Back” pa haci nan prome dia di scol extra memorabel.  Trahadornan di e Resort a yuda cu nan tempo y creatividad pa prepara y traha entradanan festivo. 

   Riba prome dia di scol, e team tabatey tambe pa duna bon bini na studiantenan y yuda cuminza nan Aña Escolar nobo cu sonrisa grandi y energia positivo, e.o. Mon Plaisir School San Nicolas, Rayo di Solo Kleuterschool, Adventist Academy, Fontein Kleuterschool, y Scol Preparatorio Tarcisius.

   Nan ta agradecido na Kiwanis Club of San Nicolas y tur cu a contribui pa haci e iniciativa aki posibel.  E potretnan aki pa cortesia di Secrets Baby Beach Aruba.