E prome Tropic Alé Banana Run ta tuma lugar dia 9 di october

Participa y bo tin chens di gana un biahe pa 2 persona pa Costa Rica

ORANJESTAD (AAN):  Tropic Alé ta e marca di bacoba mas grandi na Aruba, un marca crea door di Compra Ltd pa representa un Bacoba premium produci na Costa Rica. E bacoba aki ta uno special, cultiva den e teranan mas fertil, siguiendo e standardnan di calidad agrilcultor mas halto pa sigura cu Aruba ta ricibi solamente e bacobanan di mas dushi, distribui cu pasion pa e team di Compra ltd. Ofreciento comunidad un producto di e mihor calidad y cu un balor nutricional halto.

            Bacoba Tropic Alé, un producto saludabel kier motiva comunidad pa biba un bida activo y saludabel, pa e motibo aki ta organisa e prome TROPIC ALÉ BANANA RUN Diadomingo, 9 di October,2022 den districto di San Nicolaas.

            Compra ta conoci pa organisa caredanan iconico y cu premio grandi manera e GILLETTE RUN y FRISIAN FLAG RUN, y e TROPIC ALÉ BANANA RUN no lo ta diferente! E careda aki lo consisti di un 5 mile Run & Walk y tambe un 10 Mile Run pa duna atletanan e oportunidad di desafia nan mes cu un ruta un poco mas largo cu mayoria careda na Aruba. Ademas di esaki Lo tin diferente careda pa mucha y hoben tambe, cual ta haci e evento aki uno grandi pa henter famia .

            Pa loke ta e 10 Mile Run, e careda aki lo conta cu Cash Prizes pa top 3 ganadornan den 6 diferente categoría, tanto pa atletanan masculino como femenino.  Esaki kiermen 36 Cash prizes, algo nunca bisto den caredanan na Aruba.

            A escohe pa haci e evento den districto di San Nicolas, pasobra Compra y Tropic Alé ta kere den San Nicolas y kier incentiva participacion activo den San Nicolas. Pa lansa e evento di un manera special Compra y Tropic Alé a invita representante di e Clubnan di coremento mas grandi e importante di nos isla pa duna nan e primicia di e evento, tambe a haci donacion di Afl. 5,000.00 na Kiwanis Club of San Nicolas pa por ehecuta projectonan pa mucha y hoben den San Nicolas, cu lo tin un impacto positivo pa e comunidad.

            Pa haci Tropic Alé Banana Run ainda mas interesante lo tin hopi door prizes atractivo incluyendo un biahe pa 2 persona pa Costa Rica, e pais unda bacoba Tropic Alé ta wordo cultiva.

            Tur careda cu ta parti di e Tropic Alé BANANA RUN ta conta pa e National Ranking di Patrishi Sports, kende ta encarga cu e logistica di e evento. Mester remarca cu cupo pa e evento aki ta limita y pa participa bo mester registra mas liher posibel riba www.bananarunaruba.com.Tur participante lo ricibi un Dri-Fit t-shirt promer cu e careda y un medaya y goody bag dia di e evento

            Bacoba tin un balor nutricional halto y ta un snack saludabel cu tur deportista rond di mundo ta come. E ta un fuente excelente di potasio, cual ta hacie un aliado pa reduci e riesgo di enfermedadnan cardiovascular. E tin mineralnan manera magnesium y folic acid, como tambe fibra y vitamina B6, carbohidrato y te hasta vitamina C.

            Bacobanan ta yuda nos mehora e transito intestinal y procesonan digestivo y ta yuda nos sinti yen.  Babocanan ta contene 3 sucu natural-sucrose, fructose y glucose, door di esaki un bacoba ta duna bo un boost di energia instantanio, sosteni y substancial. 

            Studionan a demostra cu 2 bacoba so ta proporciona suficiente energia pa un entrenamento extenuante di 90-minute. Pe e motibo aki, Bacoba ta un di e frutanan preferi atletanan na Mundo.