ORANJESTAD (AAN) – Sharline Koolman, Hefe di Departamento di Malesanan Contagioso (DBZ), na Departamento di Salubridad Publico (DVG), y Crisis Team Leider, den conferencia di prensa di dialuna, e siman aki, a toca tambe e tema di vacunacion.
El a remarca cu siman pasa e cantidad di ciudadanonan cu kier vacuna, a cuminza subi atrobe. Esaki ta hopi relaciona cu viahamento, Koolman a indica.
Door cu e personanan sa cu ora nan drenta Aruba bek, si nan ta vacuna no mester haci e test di PCR mas, pero nan ta haci uso di e dos vacunanan cu tin. E periodo di vacacion grandi ta yegando y e ta mustra cu e ciudadanonan ta mas motiva pa vacuna.
Esaki ta hopi bon y a base di esaki e localidad pa prik na Santa Cruz, ta bay keda draai. Nan tine habri te prome cu 14 di Juni, pero tin plan pa expande e fecha un tiki mas, pero tambe por pasa vacuna na DBZ cu a wordo habri acerca. Tambe Centro Santa Teresita ta habri ainda unda hende por vacuna.
Koolman a menciona cu nan a cuminza pa “schaal af” pasobra e cantidad di hende pa tuma vacuna tabata menos, pero mirando cu e ultimo siman, segun Sharline Koolman a compronde, na Centro Santa Teresita tin un average di 50 hende nobo pa e prome vacuna y 50 pa e di dos prik, y na Santa Cruz ta mas of menos 200 prome prik y 200 di dos prik, cu den total ta mas of menos 500 persona cu ta bezig ta vacuna pa dia, atrobe.
E Hefe di DBZ a agrega cu nan ta keda monitor esaki y basa riba e cantidadnan nan lo reduci Santa Cruz poco, poco. Pero si ta wak cu e cantidad ta bira hopi pa e seccion di vacuna na DBZ, lo keda mantene e centronan di vacunacion existente.
Sharline Koolman a haci un yamada pa esnan cu tin den plan pa vacuna, pa por fabor haci esaki mas pronto posible, pues e siman aki y otro siman ainda, pasobra na Juli si nan ta reduci y e ora ey tin chens cu e persona tin cu warda mas cu un siman pa haya su vacuna, locual cu ta innecesario, pasobra aworaki e acceso tey y por haya esaki hopi facil.
El a reitera e yamada aki pasobra Juni ta e ultimo luna cu ta bay ta vacunando den e otro localidadnan di prik.
