ORANJESTAD (AAN): Minister di Labor mr. Wendrick Cicilia conhuntamente cu Departamento di Labor y Investigacion (DAO) ta
anuncia cu a introduci salario minimo pa ora entrante 1 di januari 2026 pa asina kita e discrepancia entre e empleadonan cu ta traha 40 ora pa siman y e empleadonan cu ta traha mas cu 40 ora pa siman.
Entrante 1 di januari 2026 ta obligatorio cu tur empleado di 18 aña of mas, cu ta gana e salario minimo, gana por lo menos e salario minimo pa ora sin importa e cantidad di ora cu e ta traha pa dia, pa siman of pa luna. Entrante 1 di januari 2026 e salario minimo pa ora ta 11,58 Florin.
E cambionan entrante 1 januari 2026 ta: introduccion di un salario minimo pa ora di 11,58 Florin pa tur empleado desde18 aña independiente di cuanto ora e ta traha y e funcion cu e ta eherce.
Tambe, a ahusta e factor cu ta uza pa e calculacion di un salario pa luna. E factor a bira awo, 4,333. Esaki ta nifica cu un empleado cu ta traha 40 ora pa siman y ricibi un salario minimo di 1.986,20 Florin pa luna, entrante 1 di januari 2026 lo mester ricibi un salario di 2.007,50 Florin.
Pa ken e ta: Ken tur mester duna atencion na e cambio di ley aki entrante 1 di januari 2026: Pa controla si un empleado ta cay bou di e ley, e salario pa ora mester ta conoci. Si e salario ta mas abao cu e suma legalmente estableci di AWG. 11,58, mester ahusta e salario pa ora entrante 1 di januari 2026.
Empleadonan cu ta gana un salario pa ora mas halto cu e salario minimo pa ora di 11,58 Florin no ta cay bou di e ley aki. Tur empleado cu tin actualmente un salario mensual di 2.257,93 Florin of mas abou, mester haci uzo di e formulanan aki bou pa asina por determina si e cambio di ley aki ta aplicabel p’e.
E calculo: Aki ta con ta calcula e salario minimo pa siman of pa luna.
Pa calcula e salario minimo pa siman lo uza e siguiente formula:
Salario pa siman = cantidad di oranan di trabao pa siman x salario minimo pa ora.
Pa calcula e salario minimo pa luna lo uza e siguiente formula:
Salario pa luna = cantidad di oranan di trabao pa siman x salario minimo pa ora x factor 4,333
Pa ricibi mas informacion riba e salario minimo pa ora cu a drenta na vigor 1 januari 2026, por haci uzo di e siguiente instrumentonan:
E link pa SUELDO app (DAO calculator salario minimo pa ora):
Documento Frequently Asked Questions (FAQ) riba e salario minimo pa ora disponibel den diferente idioma riba e website di DAO: www.daoaruba.com.
Documento Frequently Asked Questions (FAQ) pa e grupo specifico di personal domestico riba e salario minimo pa ora disponibel den diferente idioma riba e website di DAO: www.daoaruba.com.
Por email na : Cette adresse e-mail est protégée contre les robots spammeurs. Vous devez activer le JavaScript pour la visualiser. of por manda un WhatsApp: 593-6934 (solamente pa pregunta riba salario minimo pa ora).
Por yama na tel: 523-7720 of por bishita oficina di DAO situa na Paardenbaaistraat 11 entre 7:30 am pa 12:00 pm y 1:00 pm pa 3:00 pm.
