E Compania di Ehercito di Ministerio di Defensa den Region Caribe a haci su rotacion

ORANJESTAD (AAN): Informacion for di Curaçao ta indica cu durante un ceremonia militar riba Dialuna mainta 3 di November 2025,

Compania Rotacion 49 a entrega su tareanan na e siguiente unidad, Rotacion 50. E Comandante nobo, Capitan Roderik Willems di Schaarsbergen, a tuma  mando di su predecesor, Majoor Marco Kamphorst, durante un ceremonia di e entrega tradicional di rema.

   Despues di mas cu cuater luna intensivo den Region Caribe, Majoor Marco Kamphorst ta wak bek cu orguyo riba e colaboracion y entrenamento di e di 43 Escuadron di Reconocemento di Brigada (Brigade Verkenningseskadron BVE) for di Havelte. Pa e despliegue aki, BVE 43 a wordo reforza den e despliegue aki cu un peloton di reconocemento di ingeniero di Wezep y dos grupo di evacuacion medico di Havelte. “Pa e unidad, e tabata un oportunidad unico pa trein den e clima tropical aki y colabora cu CZMCARIB y partnernan di seguridad local. Nos a siña hopi di operacion  den e condicionnan difícil di Region Caribe como parti di e sede conhunto di CZMCARIB.

   Corsow, Bonaire, y Aruba a brinda e pelotonnan di reconocemento e oportunidad pa engrandece nan habilidadnan militar general, y tambe pa entrenamento mas specializa, manera tareanan di reconocemento y vigilancia tactico y tecnico, combate di cerca, (Close Quarters Battles) y despliegue di sistemanan no tripula y drone. Fuera di por a traha riba aumenta nan propio preparacion operacional, nan a colabora y entrena tambe cu e militarnan di Corsow, unidadnan di CZMCARIB, y partnernan local di seguridad.

   Tabata remarcabel pa mira con, apesar di diferencianan den antecedente y metodonan di trabao, nan por a contribui conhuntamente na seguridad y stabilidad. Aunke tin biaha nan mester a ahusta nan ambicionnan, e periodo aki no solamente a aumenta e conocemento y habilidadnan, pero tambe a fortalece nan concientizacion situacional y lasonan cu partnernan den Caribe.”

   E compania Charlie “Tiger” ta cuminza cu su di cinco Rotacion den Region Caribe. Capitan Roderik ta ancioso pa traha y train cu su unidad den region. Como parti di e di 11 Batayon di Infanteria, e Regimento di Guardia di Granadero y Casador (Grenadiers/Jagers), nan ta wordo desplega normalmente for di helicopter of cu parachute, dentro di e tres misionnan principal di e forzanan arma. E compania ta entrega poder di combate di calidad halto riba tera y for di laira. Como un compania den West, e enfasis ta principalmente riba operacionnan na pia. Durante e proximo cuater lunanan, e unidad lo wordo reforza cu capacidad medico di e di 11 Compania Medico y un grupo di sistemanan aereo no tripula (Unmanned Aerial Systems UAS) cu drone. Ademas di ta cla pa realisa misionnan pa CZMCARIB, e enfoke lo ta riba su propio programa di entrenamento. E clima y medio ambiente ta provee ​​un oportunidad excelente pa traha riba desaroyo físico y mental, liderazgo y determinacion dentro di e unidad. Capitan Roderik ta ancioso pa colabora cu partnernan di seguridad local y ta spera di bay haci di esaki un periodo agradabel y productivo.

   Ehercito Real di Hulanda tin un compania permanente den Region Caribe. E unidad aki, comanda pa CZMCARIB, por wordo desplega pa un variedad di tarea. Durante e proximo cuater lunanan, e compania lo ta train na Aruba, Bonaire, y tambe na Corsow.