DVG y Santa Rosa dunando un man pa Aruba tin stock di carni fresco pa fin di aña

ORANJESTAD (AAN): Tur fin di aña, ta un costumber y tradicion cu nos pueblo di Aruba mester tin un plato crioyo cu ta tipifica e diferente plato nan Arubiano riba mesa. Un sopi of stoba di Cabrito of Carne no por falta riba mesa.

   Pesey mes Santa Rosa semper ta stimula tur Criador nan di bestia local, pa nan  percura pa nan bestianan semper ta bon cuida pa asina no tin problema na momento di worde gekeur na Abbatoir. Manera semper den e temporada di fin di aña hopi ta esnan cu ta busca pa cumpra carni of Pisca. Pa motibo cu esaki ta e temporada caminda cu carni fresco ta mas solicita, Departamento di Agricultura, Cria y Pesca ta concientisa no solamente e criado pa asegura cu nan producto ta di calidad pero tambe ta importante pa e consumidor nan tene bon na cuenta e rekesitonan di control cu mester tene cuenta cu ne.

   E demanda grandi cu e carni bestia chikito tin den e temporada aki ta haci cu por tin esnan cu lo opta pa sacrifica na nan cunucu sin tin e control debido di parti di DVG cual ta prohibi. Departamento di Agricultura, Cria y Pesca ta haci un apelacion na tur criado di bestia, pa asegura cu nan haci nan cita na tempo via Abbatoir y pa na momento di bende nan producto nan, pa nan por tin muestra di goedkeuring cu ta ser duna na Abbatoir.

   E maneho di DVG ta stipula cu tur criado di bestia, sea Cabrito of Carne y/of Porco y te hasta Baca, mester worde gekeur prome cu esaki worde bendi pa consumo.

   Tur bestia pa consumo mester worde sacrifica y controla door di e profecionalnan di Abattoir. E Keurmeesternan ta controla tur organo di e bestia prome cu e haya su stempel oficial di Gobierno. Na momento cu e keurmeesternan di Abattoir tuma nota cu algo no ta bon e cu bestia, esaki ta worde tuma den beslag y ta deshaci di esaki. Tur criado di bestia mester yama servicio di Veterinario, Abattoir na telefoon 522-4310 pa haci un cita adelanta y alavez resgistra cuanto bestia lo mester worde sacrifica pa asina tur cos bay di acuerdo cu regla. Corda cu tin regla y protocolnan di COVID-19 stipula cu cada criado mester tene na cuenta.

E siguiente apelacion ta bay na tur consumidor na momento di busca carni di bestia local pa cumpra. Na momento di cumpra carni, semper opta pa cumra cerca criador nan cu abo sa cu su bestianan ta worde mata na Abattoir y cu por mustra nan carchi di goedkeuring. Tuma nota tambe na momento di cumpra parti di e bestia, pa haci un control pa verifica si bo ta mira cu e carni fresco na e momento ey tin e stempel di Gobierno ariba dje. Esey ta nifica cu el a worde gekeur pa e Kuermeesternan di abattoir. No lubida cu matamento di bestia na cas of cualkier otoro caminda cu no ta na Abattoir ta contra ley e tin sancion pa esaki