Sea alerta pa bo salud
ORANJESTAD (AAN): Directie Volksgezondheid (DVG) ta haci yamado na tur biaheronan cu a regresa Aruba recientemente di vacantie of di viahe pa exterior, pa ta atento riba nan estado di salud den e dianan despues di yega Aruba.
Mirando desaroyo internacional unda tin aumento di varios malesanan infeccioso y di malesanan transmiti pa sangura, DVG ta enfatisa cu ta importante pa tur persona cu a biaha pa ta conciente di eventual sintomanan cu por indica un malesa importa.
Sintomanan cu mester wordo tuma serio ta entre otro: (*) Keintura, (*) Dolor di cabes, (*) Dolor di scarnir (articulacionnan) of muscular, (*) Rash of manchanan riba curpa, (*) Tosamento, (*) Dolor di garganta, (*) Diarrea, (*) Sacamento, (*) Cansancio extremo, (*) Wowonan cora, y (*) Kliernan hincha.
E sintomanan aki por relaciona cu malesanan manera Chikungunya, Keintura Geel, Sarampi of otro infeccion gastro-intestinal.
DVG ta conseha tur biaheronan cu presenta un of mas di e sintomanan aki pa tuma contacto cu nan dokter di cas mesora pa haya evaluacion medico y instruccion apropia. Dokter por determina si tin necesidad pa haci test adicional of tuma otro medidanan di prevencion.
Ta di suma importancia cu persona cu ta busca atencion medico semper menciona nan historia di biahe reciente. E informacion aki ta esencial pa e evaluacion medico y yuda identifica mas lihe posible un eventual malesa.
Door di informa na tempo, no solamente bo ta proteha bo mes, pero tambe bo ta contribui na proteccion di bo famia y comunidad.
DVG ta sigui monitoria e situacion regional y internacional y lo continua informa comunidad ora ta necesario.
