Minister di Salud y Turismo Dangui Oduber:
ORANJESTAD (AAN) – Minister di Salud Publico señor Dangui Oduber, a splica den conferencia di prensa, Diahuebs, cu den luna di Maart 2022, e rapport tocante e investigacion realiza pa profesornan Hubben y Batenburg, encuanto eficiencia y efectividad di cuido medico na Aruba, a wordo entrega; pero, e ta pendiente un feedback di Ministerio di Salud, riba e rapport aki.
E mandatario a sigui splica cu despues cu esaki a wordo entrega, e proceso cu ta sigui riba e palabracionnan haci, ta bay bin un inicio pa e proximo pasonan di e rapport di ambos profesor.
Recientemente, a tuma lugar aki na Aruba, e reunion di e ministernan di salud di Curacao, Sint Maarten y Aruba y e Ministerio di Salud, Deporte y Bienestar di Hulanda, durante cual a yega na conclusionnan concreto riba puntonan di accion, cu ta en comun entre e cuater paisnan aki, con nan ta percura pa hisa e calidad di cuido y con pa traha mas alinea na otro.
E dignatario a indica cu esaki a keda inclui basa riba e feedback cu Ministerio di Salud di Aruba a duna, riba e rapport Hubben y Batenburg. Tambe na Juni a wordo institui e Dutch Caribbean Hospital Alliance. E intencion ta pa traha na un forma mas estrecho cu otro, pa asina por brinda miho cuido y servicio, y por logra reduci gastonan pa e aseguradonan tanto na Aruba, como Curacao y Sint Maarten.
El a bisa cu e intencion ta pa, den luna di Juli, basa riba tur e recomendacionnan cu wordo treci dilanti pa profesornan Hubben y Batenburg y e recomendacionnan treci dilanti pa e Comision Nacional di Cuido y ademas CAft, y tambe di e “Five Ways Model” cu AZV a presenta den luna di Mei 2020, traha un Roadmap, conhuntamente cu TWO (Table Werk Organizatie) y e Roadmap aki lo mester kico ta e puntonan di accion concreto, cu lo mester bay pone atencion na nan y percura pa implementa nan, pa asina por tin un miho calidad di cuido, eficiente, eficaz y naturalmente pagable pa nos comunidad, y keda cu e acceso na e cuido cu nos pueblo por a experiencia y cu sigur Aruba ta un di e tiki paisnan na mundo cu por ofrece un pakete di seguro manera Aruba su aseguradonan ta haya.
Minister Oduber a remarca cu pesey e tipo di ehercicionan aki ta asina importante pa por garantiza awo y den futuro, pa e keda sostenible tambe.
