Abuso di Adulto Mayor no por ta e modus operandi comun y coriente
ORANJESTAD (AAN): Drs. Melva Croes-Yanez, un neuropsicologo y presidente di Fundacion Alzheimer Aruba a indica cu un tras di otro, articulonan den prensa y rapportnan riba e calidad di cuido den e casnan di cuido na Aruba ta sigui mustra un realidad doloroso: casonan di abuso, negligencia y falta di atencion debido ta na ordo di dia.
Como presidente di Fundacion Alzheimer Aruba (F.A.A.), y Proyecto “No Excuse for Elder Abuse”/ “Bisa No Abuso di Adulto Mayor”, e ta cuestiona severamente e expresion di e Minister concerni di Salubridad den prensa. E Minister concerni ta insisti cu "abuso semper a tuma luga", hasta cerca mucha y mayornan na cas – unda “sla tambe sa cay”. Ta parce como si fuera e calamidadnan aki ta un modus operandi comun y coriente, cu tambe ta pasa tur caminda na mundo. E mensahe aki di Minister ta totalmente condenabel y F.A.A. ta considera e pensamento aki di Minister un falta di respet enorme pa nos comunidad y sigur pa nos adultonan mayor.
Nos adultonan mayor merece miho! Nan ta depende y merece un maneho cu ta sirbi nan dignidad, siguridad, bienestar di salud, proteccion y supervision di nan derechonan humano, leynan y protocolnan fuerte pa proteccion y supervision contra abuso financiero, fisico, of di negligencia.
E contesta aki NO ta loke pueblo ta spera di un mandatario cu mester carga y demostra responsabilidad di e bienestar di salud di e adulto mayor. E contestanan aki tampoco ta un hustificacion pa e falta di accion. Fundacion Alzheimer Aruba ta exigi un investigacion inmediato riba e calamidadnan den casnan di cuido y un politica di zero tolerancia pa proteha e adultonan mayor, sin excepcion.
E maneho pa cu cuido optimal den casnan di cuido NO solamente mester yega te lesa y comenta rapportnan di abuso, sino tambe actua di tal forma cu e cantidad di abuso ta baha drasticamente y real. Entre otro door di activamente bin cu reglanan firme pa preveni abuso di adulto mayor den tur sector unda ta duna servicio na Adulto Mayor. Activamente ta encera un cambio di mentalidad den hiba un maneho eficiente, realistico y duradero.
