Docentenan di St. Paulus School a splica ‘Mi ta stima bo’ na esnan na Estonia

ORANJESTAD (AAN): Manera cu DIARIO a trece dilanti caba, 14 docente di St. Paulus School na San Nicolas

a pasa nan vakantie di October na e pais Estonia cu asistencia di Erasmus+, Futura, y SKOA pa asina experiencia di cerca uso di tecnologia den scol y avancenan tecnologico den e pais.

   E docentenan lo bay hasta haci ‘job shadowing’ na Kohtla-Järve Slavic Primary School y lo sigui charlanan di sosten na E-Estonia Briefing Center, E-Governance Academy y un workshop na Tallinn University, danki na Futura.  Ademas nan lo haci bishita na diferente museo y lo tin intercambio cultural na 2 diferente ocacion.

   Estonia ta situa pazuid di Finland, y pariba di Suecia, cerca di Latvia y Lituania.

   Futura a sostene e grupo di Aruba, door di facilita nan e workshop na Tallinn University, y a conecta nan cu e expertonan clave na Estonia E-Governance Academy, pa yuda nan cu un bista diferente y colaboracionnan pa mehora e forma di duna les na Aruba.

   Tambe por a nota cu durante e bishita, e docentenan di St. Paulus School cu orguyo a bisti Polo Shirts cu “I Love San Nicolas” riba dje, y a duna un bista visual tambe di algun palabra importante na Papiamento, incluyendo “Mi Dushi”, “Con Bay”, y “Mi ta stima bo”.  Tambe a resona musica di Carnaval, y a crea un mini-jumpup di Carnaval pa nan sinti e ambiente.