Director di AZV, Edwin Jacobs ta refuta totalmente e carta di HAVA pa comunidad

 ORANJESTAD (AAN) – Diahuebs mainta director di AZV, Ir. Edwin Jacobs, a reacciona y duna un aclaracion, tocante un carta cu Asociacion di Docternan di Cas Aruba (HAVA) a publica, unda e ta avisa cu cinco docternan di cas lo haya nan retiro for di AZV.

Ir. Jacobs a expresa cu AZV a keda sorprendi pa e comunicado cu HAVA a manda pa comunidad, dunando diferente informacion incorecto, exponiendo un biaha mas mitad berdad, y esaki sigur no ta contribui na un bon relacion, entre e Organo Ehecutivo di AZV, como e Seguro Medico pa nos poblacion, y pa grupo asina importante, cu ta e cuido di prome linea cu ta nos docternan di cas.

“Nos por tuma nota den e comunicado di HAVA cu e ta relata un situacion pa loke ta nan gastonan cu ta aumenta desde 2013, cu ta duna impresion cu AZV no a mustra e boluntad pa traha riba e asunto aki.

Ta bon pa cuminza na refuta cu esaki ta completamente, no ta berdad. Na diferente ocasion na 2013, AZV a purba pero HAVA ta esun cu no tabata cla pa papia riba e tema aki te cu nos a yega na e pandemia, cu nos tur sa cu henter e pais a sufri, cu ainda, te dia di awe un cantidad di trahador ta bay cas cu 60, 70 of 80% di nan salario, cu expectativa cu e proximo lunanan tin un mehoracion. Bao e condicionnan ey, HAVA a presenta un documento na AZV, y e proposicion ey ta aumento di e gastonan di cuido.

Bo por compronde cu den un situacion di crisis unda cu entradanan di prima ta cay drasticamente, unda cu Hulanda y Aruba a firma pa sosten financiero, y a yega na un acuerdo pa reduci 60 miyon den servicio di cuido, ta imposible pa nos por yega bay di acuerdo, bao di e circumstancianan actual, pa aumento di cualkier compensacion pa cualkier dunador di cuido na Aruba.

Pues, e parti ey laga nos refute. E parti ey no ta cuadra cu e realidad cu a pasa na 2013 y 2020-2021.

“Mas leu, HAVA ta crea panico innecesario, bao di nos aseguradonan, indicando cu 15 mil asegurado lo keda sin e servicio di cuido medico basico di docter di cas. Nos ta refuta esaki totalmente. HAVA ta mas miho informa, di kico AZV ta haciendo na e momentonan aki, pa nos por atende cu e cinco docternan di cas cu ta bayendo pasobra nan contrato ta termina” Jacobs a remarca.

E funcionario a sigui splica cu AZV ta reuni, semanalmente, cu HAVA hunto cu e Hefe di Division y Cuido, señor Samuels hunto cu señora de Jong, cu ta e persona cu tin e relacion aki cu e docternan di cas y semanalmente nan ta wordo informa di e plannan di AZV pa cu e hecho cu cinco docter di cas a retira, pasobra nan contrato a termina.

“Ora cu HAVA a pone den su comunicado pa comunidad, cu e cinco docternan aki ta bay puramente pa motibonan financiero economico, esaki tampoco ta berdad. Dos docter di cas ta bay pasobra a yega edad di bay cu pension, un di nan na prome instante a acepta un prolongacion di su contrato pero for di 1 di Juli e no kier extension mas, y nos a busca un solucion pa cu esey. E otronan tin diferente motibo ta hunga un rol, un tin malesa, un tin yiu a bay studia na Hulanda y kier regresa bek, otro ta pa relacion, y un si ta pa motibo financiero cu a scoge bay traha na otro pais unda ta bay haya mas entrada. Pero pa HAVA pone cu cinco docter di cas ta bay y 15 mil asegurado no ta bay tin e servicio aki pa motibo di e parti financiero, ta mustra insensibilidad y falta di empatia di HAVA, pa un comunidad suta pa un pandemia cu a come e entrada di mayoria di nos hendenan, creando hopi problema y tension”, Ir. Edwin Jacobs, Director di AZV a señala.