Directie Ouderenzaken ta promove bienestar di adultonan mayor cu proyecto di planta mata

Directora, Desiree Helder:

ORANJESTAD (AAN) – Directie Ouderenzaken (DOZ) ta fortalece e bienestar di adultonan mayor door di implementacion di diferente actividad recreativo y educativo na casnan di cuido, den estrecho cooperacion cu varios instancia. Un di e iniciativanan ta e proyecto di planta mata y cosecha, realisa den colaboracion cu Santa Rosa y EPI, cu ta ofrece adultonan mayor un experiencia bunita y un oportunidad pa comparti un dia agradabel hunto.

Directora di Directie Ouderenzaken, Desiree Helder, a indica den un entrevista cu DIARIO cu specialistanan di Santa Rosa lo orienta e participantenan tocante e manera corecto di planta y cuida mata. Como parti di e proyecto, tambe lo wordo suministra tera, simia y diferente tipo di mata. E actividad a wordo diseña cu accesibilidad na mente, mediante uzo di bakinan adapta pa permiti cu tur adulto mayor, incluyendo esnan cu ta uza rolstoel, por participa activamente.

Segun Helder, tipo di iniciativanan aki ta esencial pa mantene adultonan mayor activo, productivo y socialmente envolvi. Ora adultonan mayor ta ocupa den actividadnan significativo, no solamente nan ta fortalece nan condicion fisico, sino tambe nan bienestar mental y emocional. Ademas, e actividad ta crea un espacio unda participantenan por socialisa, comparti experiencia y fortalece nan relacion cu otro.

Helder a agrega cu e meta ta pa expande e proyecto na tur centro di cuido y centro di pasadia pa adultonan mayor na Aruba, asegurando cu cada institucion haya e facilidadnan necesario, incluyendo bakinan special di planta. Segun e, tin un necesidad grandi pa mas actividad recreativo y educativo den e centronan. Ta e deseo y intencion cu tur adulto mayor haya e oportunidad di participa den tipo di iniciativanan cu ta promove bienestar, independencia y calidad di bida.