Diego Gale cu elogio pa palanca di Salsa Percy Pinedo. 

ORANJESTAD (AAN): Durante fin di siman, Aruba su orguyo cantante internacional  Robert Jeand’or a realisa grabacion di voz pa e tema musical salsa  "Cuarto Bate".

Tambe a realisa grabacion pa e video clip di "El Chuleton", cual Salsa ya Robert a graba su voz.

   Ta trata di un proyecto cu e meta pa Robert Jeand’or ta back den e gigante nan di Mundo di Salsa. E gigante proyecto aki ta den man di nada mas y menos, El Maestro Musico Colombiano Diego Gale, famoso percusionista y director musical di su propio famoso Grupo Gale.

   E grabacion di voz y musical a ser realisa den studio di Diego Gale na Doral, Miami. E parti musical a ser graba pa musiconan specialisa den grabacion di Salsa den studio y ta trata di musiconan cu ta graba pa celebridadnan manera Marc Anthony, Oscar D’Leon, El Canario etc. Loke ta resalta den e proyecto aki ta, cu e dos Salsa su composicion nan ta obra di nos propio orguyoso compositornan, Martin Quandus cu a skirbi e Salsa "El Chuleton" y Chicho Kock hunto cu Robert Jeand’or a skirbi e Salsa "Cuarto Bate".

   Mester duna credito na Alvin Giel, kende ta e motor incansable tras di e gigante proyecto aki. Su curashi y perseverancia a pone logra haya contacto durante e temporada di Pandemia cu El Maestro Musico Colombiano Diego Gale.

   Alvin Giel a organiza e viaje y tur preparacion pa e grabacion historico aki na Doral, Miami. Tambe a realisa e viahe, baluarte musico Arubano, Danny Koolman, kende hasta a comparti idea nan durante grabacion di voz di Robert cu El Maestro Diego Gale.

   Tambe durante un combersacion no graba, Diego Gale a menciona algun di su valioso contactonan den Mundo di Salsa cu lo bay gusta y promove e produccion aki den un exito sin duda. Entrenan cu Diego Gale a menciona ta e palanca salsero di Curacao, El Maestro Percy Pinedo.

   Stap pa stap e produccion aki lo cuminsa cana. E Salsa "El Chuleton" lo ta e prome Salsa cu lo bay ser estrena riba YouTube y Mundo completo di Salsa. Na momento cu "El Chuleton" ser estrena, PoetsTV Aruba lo pasa na Telearuba tur loke a ser realisa aki na Miami, tanto e grabacion di e video clip den cayanan di South Beach, grabacion di voz di Robert Jeand’or y un interesante entrevista cu El Maestro Diego Gale den su propio studio sofistica.

   Potretnan aki y relato, pa cortesia di Jan Poets.