Diaranson awor barco di crusero ta yega Aruba pa prome biaha

Celebrity Cruises a cuminza bek den Caribe cu salida for di St. Maarten

ORANJESTAD (AAN): Diaranson awor, pa prome biaha un barco crusero cu pasahero lo yega Aruba, despues di 15 luna cu e industria aki den Caribe tabata paraliza.

   E barco crusero Celebrity Millennium ta bay ta na cabez di e industria di crusero, ora cu nan ta bira e prome cu ta cuminza nabega den e area aki, habriendo caminda asina pa nabega den verano aki.

   Cu celebracion y hopi fanfaria, Celebrity Cruises su tan spera regreso cu viahenan crusero a bira un realidad den fin di siman, ora cu e barco luhoso di Celebrity Millennium a sali Diasabra 5 di Juni for di e waf di Philipsburg na St. Maarten.  Nan a bira asina e prome den Caribe y Norte America cu ta haci esey, y e prome di e barconan di Celebrity cu ta cuminza opera bek.

   Nan a sali riba un viahe di 7 anochi, bishitando e isla di Aruba, Barbados, y Curacao.  Pasaheronan cu a warda 15 luna pa por a nabega atrobe, tabata cla pa experiencia e maraviya riba lama.

   Diadomingo 6 di Juni nan tabata henter dia riba lama.  Awe Dialuna 7 di Juni nan lo yega na Bridgetown (Barbados) for di 8:00 am te cu 6:00 pm.  Diamars 8 di Juni nan lo ta henter dia riba lama.

   Celebrity Millennium lo yega Aruba, riba Diaranson 9 di Juni 2021 pa 7:00 am, y nan lo keda mara te cu 6:00 pm.

   Diahuebs 10 di Juni e lo ta mara di 8:00 am te cu 6:00 pm na Willemstad, Curacao.  Diabierna 11 di Juni e lo ta bek riba lama, y Diasabra 12 di Juni e lo ta drentando bek na Waf di St. Maarten pa 7:00 am.

   E viahe aki a bira e prome biaha tambe cu Celebrity Cruises a usa e waf di St. Maarten como un “Homeport”.  Di e waf aki nan lo ta nabegando viahenan pa ‘Eastern Caribbean’ y ‘Western Caribbean’ te cu Augustus.  E otro viahenan tambe ta di 7 anochi, y lo bishita Tortola (British Virgin Islands), Castries (St. Lucia), y Bridgetown (Barbados).

   “Awe nos ta nabegando atrobe!  Esaki ta un momento hopi significante pa nos compania, nos industria, y Caribe.  Cu e dia aki porfin a yega pa nos huesped y nos tripulantenan ta algo special,” ta loke Lisa Lutoff-Perlo a bisa.  E ta president y CEO di Celebrity Cruises.  “Mi ta hopi contento cu nos tin nos tripulantenan bek abordo pa haci loke nan gusta y suministra vacacionnan fabuloso, y bon servicio na nos huespednan.  Mi ta contento tambe na e liderato di Gobierno di St. Maarten pa nan vision y sosten pa logra cu esaki a socede.  Un honor grandi pa ta e prome persona pa na forma yen entusiasmo bisa un biaha mas: ‘Bon bini abordo’!”

   Capitan Theodoros Zakkas di Celebrity Millennium a agrega: “Den ultimo lunanan, mi tabatin e privilegio di mantene e barco bunita aki cu un tripulacion chikito di 75 persona.  Awe cu nos ta bek cu un tripulacion completo, tur tin un sonrisa riba nan cara pa duna bon bini na nos huespednan un biaha mas abordo, y ta algo emocional pa mi.”

   MEDIDANAN NOBO:

   Celebrity Millennium ta nabegando cu standardnan mas halto di salud y seguridad, cu ta culminacion di mas di un aña di trabao diligente cu autoridadnan di salubridad publico, agencianan gubernamental, y un panel di Healthy Sail, consistiendo di lidernan cientifico, medico, y di salubridad publico.

   Ademas tuma nota cu e lanzamento di viahenan ta un restard den fase cu capacidad reduci pa asina permiti mas espacio natural.  Tambe a crea procedimento nobo pa salida, yegada, y training di emergencia pa pasaheronan (muster safety drill), y tambe cambio den forma cu ta bende ticket pa excursion ora nan yega e.o. Aruba, y tur esey ta refleha un standard nobo pa salud y seguridad.

   Tanto e pasahero- y tripulantenan ta bay traha hunto pa purba mantene protocol abordo, y e medidanan nobo aki ta inclui:

• Vacunacion: Celebrity lo nabega den Caribe cu tur tripulante ya vacuna y por lo menos 95% di pasaheronan mester ta vacuna.
• Salida y yegada: Lo bay duna tur pasahero un horario cu e mester tey pa sea subi of baha e barco, pa asina reduci cu tin aglomeracion ora di haci esey.
• Transaccion contactless: E mobile app digitalmente avanza di Celebrity ta transforma e estilo bieu di bisti salbabida y bay train emergencia pafo, den un experiencia personal di eMuster cu bo por completa riba bo app mes.
• Tapaboca: Ora di check-in na e Terminal y tambe check-out, tur pasahero di 2 aña of mas tin di bisti un tapaboca. Pero ora bo ta abordo, bo no mester di tapaboca.  Solamente si nan ta mara na un waf unda Gobierno ta obliga esey.  Esaki segun guia recien di CDC di Merca pa nabega cu hendenan ya caba vacuna y tripulantenan tambe vacuna.

   Riba e potret por mira momento cu e barco a bandona St. Maarten riba Diasabra anochi.