Diahuebs awor tin premiere di Documentario nobo di Rufo Wever

ORANJESTAD (AAN): Tin un documentario nobo traha na Aruba!  E Documentario “Musica Ta Mi Bida” ta basa riba e bida di musico Rufo Wever.

   En conexion cu nos dia di Himno y Bandera 18 di Maart un documentario lo ser presenta "Musica Ta Mi Bida".

   E ta un documentario riba e bida y importancia musical y historico di e compositor Rufo Wever.

   Ademas di ta co-compositor di e himno di Aruba “Aruba Dushi Tera”, Rufo a compone 450 composicion.  Rufo Wever tabata un musico completo cu ademas di domina piano, saxofon, clarinet, accordion y tur otro instrumento nan ritmico tabata skirbi partitura pa documenta su musica y tabata traha areglo. Ademas Rufo a skirbi partitura y areglo pa hopi otro compositor nan di e tempo ey cu a keda conserva.

   Rufo Wever tabata e prome persona na Aruba cu a pone musica pa caha di orgel y a haci esaki pa 33 aña.

   Musica ta hunga un rol esencial den e identidad cultural di un pueblo.

E ta importante den nos luna cultural y cu nos Dia di Himno y Bandera pa nos yuda preserva nos identidad cultural.

   Ta e deseo cu e documentario aki di e bida y contribucion cultural di e musico y compositor Rufo Wever lo sirbi pa motiva nos joven nan.

   E documentario aki ta produci pa Norman Thijsen y Vivian Wever cu post-production di Sky Television.

   E invitacion ta bay pa mira e premiere riba Diahuebs 17 di Maart 2022 pa 7:00 pm riba ‘Nos Isla TV’, cu ta canal 23.