Diahuebs 7 di November lo tene un foro politico pa mira ki e partidonan politico tin pa p’ariba di brug

Errol De Freitas presidente di SNBA:

*SNBA lo mustra su vision cu tambe ta cla 

ORANJESTAD (AAN) –Errol de Freitas, Presidente di San Nicolas Business Association (SNBA), den entrevista cu DIARIO a menciona pakico nan lo tene un foro politico, pa diahuebs 7 di November awo, na Teresita Center.

“Como NGO, mi no ta kere cu nos tin e afinacion ni e capacidad di por organiza un Town Hall, ni mucho menos un debate. Debatenan, na paisnan grandi, ta wordo organiza door di prensa. Temponan aya, e debatenan cu Aruba a conoce politicamente, tabata wordo organiza door di prensa y Telearuba. Awendia, e aspectonan aki tin cu sigui. Den nos caso, e unico cos cu ta interesa nos, cu aworaki ta e temporada, temanan di campaña unda cu San Nicolas ta bira popular”, de Freitas a comenta.

            El a agrega cu nan a organiza e foro aki cu intencion di papia cu tur e partidonan politico pa mira kico nan tin, pa p’ariba di brug.

            “Esunnan cu tin nos a scucha, anto despues nos ta cuestiona. Y na final di dia nos ta bay duna nan nos vision, pasobra nos vision tambe ta cla. Pues na final di dia nos ta dunando nos tempo aki, na San Nicolas Business Association, ta scuchando y papiando cu pueblo comercial, y cu sa ki ta going on pariba di brug”, De Freitas a señala.

            El a splica cu SNBA a traha su plan, cu ta un plan integral, y esey ta e motivacion pa un foro. Pa tur politico por presenta na e asociacion nan plan di programa pa p’ariba di brug y nan ta intercambia e ideanan, cu kizas nan por hiba cu nan.

            “Pa eleccion pasa tabata e “National Transformation Map”. E nomber tabata masha bunita; kico di dje a wordo hiba, na final di dia? E ta masha bunita pa un partido politico den gobierno cu nan tin un programa, pero bo no por bin den un distrito pa bin impone bisa ki bo ta pensa cu e distrito tin cu haya. Bo tin cu scucha di e pueblo ey, y di e organizacionnan pa weita enberdad, si bo ta riba un bon pia. Esey ta e motibo!”, Errol de Freitas a señala.

            Presidente di SNBA a sigui bisa cu den e caso aki, nan a entrevista varios partido caba y e combersacion cu partido PPA, cu señor Otmar Oduber, tabata fuerte. “E tabata bon; e intercambio tabata hopi bon pasobra nos a scucha su punto di bista y despues nos a dialoga. Despues di esey, Dialuna cu a pasa nos tabata tin partido HTC y Accion 21”, De freitas a relata.