ORANJESTAD (AAN): Diadomingo 13 di November, pa 7:30 pm, Ateliers '89 Punto Di Beyas Aruba lo presenta den su espacio di exposicion na Ateliers '89 mes, su gran show di gala di Moda Arte, titula ‘Meteo’.
Bao di experticio di e maestra artista Glenda Heyliger, pa diferente siman largo e artistanan aki conoci caba di Ateliers '89, a duna e workshop pa diseña moda! Creadornan manera Aldrich Kelly, Janine Flanegin, Ligia Violenus, Bruce Stamper, Velvet Zoe Ramos, Marleen van Blarcum, Farley Croes y Judith Werleman a bin ta traha hunto hopi duro pa realisa Meteo Fashion Show di moda arte. Sin duda alguno nan lo bay presenta un show unico saliendo di e tematica nubia.
Siguiendo e tematica aki e artistanan diseñador bao e guia di e fantastico artista maestra Glenda Heyliger, nan lo presenta nan mes un concepto di kico e tematica aki ta nifica pa nan obranan construi pa nan mes. Mirando tur locual ta pasando den nos medio ambiente, clima y nubia. Un show cu hopi sorpresa cu cantidad di diferente di smak, creacion y kico si ta moda arte nubia. Tambe lo tin e oportunidad ora bo yega na Ateliers '89 pa mira cu e ultimo oportunidad e exhibicionnan di arte cu ta andando actualmente esta Caribbean Linked VI y arte pa hole y sinti titula Savoury Memoir in Colored Spices.
Lo mas fenomenal ta cu admision ta gratis.
