Diadomingo 3 di november tin apertura di Festival di Buki di Mucha “Dushi Cabesura”

Den Cas di Cultura, cuminzando 3’or di atardi

ORANJESTAD (AAN) – “Dushi Cabesura” ta e tema di e di 32 Festival di Buki pa Mucha. Asina Astrid Britten, Directora di Biblioteca Nacional Aruba,  duna di conoce den conferencia di prensa.

            “Un biaha mas nos t’ey pa loke ta trata nos programa di e Festival di Buki pa Mucha. Un par di siman pasa, e presentacion di e buki a keda haci pa prensa, cual ta ‘AZA y e Portanan Magico’, skirbi pa nos autor local Liliana Erasmus, y ilustra Danielle Schorhorts, for di Hulanda”, Astrid Britten a duna di conoce.

            Señora Britten a bisa cu mester corda cu compra di cualkier buki na e dos boekhandelnan participante, ta ricibi un buki di e festival completamente gratis. BNA ta motiva tur hende pa haci esaki.

            “Pero nos ta aki, principalmente, pa nos pone enfasis riba apertura di nos Festival di Buki, cu ta bay ta Diadomingo awo, dia 3 di November, y ta bay ta den forma di matinee”, Astrid Britten a señala.

Seguidamente, el a pasa palabra pa señora Zetsia Ponson, Coordinador di Festival di Buki pa Mucha 2024, ken a reitera cu Diadomingo 3 di November awo, pa 3’or di atardi, ta haci apertura di e Festival di Buki, cu un tremendo show na Cas di Cultura.

            Pa 3’or di atardi e librerianan local lo tey presente, por compra buki y asina aki ta haya esun di e Festival, di regalo, y pa 4’or ta cuminza cu e show.

 PROGRAMA:

            Lo cuminza cu un video di Prome Minister Evelyn Wever-Croes, despues Kitty de Jong lo canta e cantica di e Festival di Buki 2024 “Dushi Cabesura”, acompaña pa su amigonan di Princess Amalia Basis School, e video clip cu BNA a produci e aña aki por mire via you tube. Seguidamente, Astrid Britten Directora lo lesa un storia, lo tin presentacion di Diamond Kids, Colegio San Hose, Rosea Cultural, Liliana Erasmus, autor di e buki di e Festival lo conta un storia riba stage live, y lo cera e atardi cu un bunita presentacion di Kylie y Katya, cu ta dos damita basta conoci riba you tube, y nan tin un cantica masha leuk cu yama “Coco”.

            Tambe lo presenta e 16 autornan cu ta invita e aña aki. Nan ta di Bonaire, Curacao, Hulanda, Statius, Sint Maarten, y di mes, Aruba. Pa esnan cu lo no por ta presente, e lo wordo pasa na TV canal 13.