Diabetis Run organiza pa Botica di Servicio a genera 10 mil florin pa yuda Fundacion Diabetis Aruba

ORANJESTAD (AAN): Durante un conferencia di prensa Diamars mainta Franz Sydow Assistant Managing Director di Botica di Servicio a anuncia cu a logra recauda 10.000 florin

pa por haci un donacion na Fundacion Diabetis Aruba (FDA), pa asina por funda e asina yama ‘Diabetis Prevention Program’.

Project Coordinator di FDA Charlene Leslie a splica cu for di 2019 caba e fundacion ta trahando riba un programa yama Prisma, cu ta enfoca riba e maneho di diabetis tipo 2.

“Tur esnan cu tin diabetis tipo 2 por participa na e programa aki”.

Door di COVID-19 nos a para un rato y e aña aki nos a start bek cu e sosten di Pan American Health Organization (PAHO), segun Leslie.

El a splica cu e programa aki lo sigui, pero e fundacion a nota e gran necesidad cu tin pa loke ta prevencion.

“Nos lo bin cu e parti di prevencion otro aña y nos ta bezig pa wak con nos ta hinke den otro, pa wak tambe con nos ta bay ofrece esaki na comunidad di Aruba”.

Nos ta gradici Botica di Servicio inmensamente pa nan bunita di 4 edicion di ‘Diabetis Run’, via cual por a recauda e suma di placa aki pa yuda nos cu nos proyecto pa otro aña, segun Leslie.

Sydow di su banda a bisa cu e ta hopi contento di por contribui na e causa.

“Pa mi e ta in situacion hopi personal, pasobra mi welo tabata tin diabetis tipo 2 y e malesa a complica e manera con e tabata biba su bida”.

Mi kier purba por yuda unda cu por, pa asina nos preveni esaki.

Nos ta hopi emociona pa nos di 5 edicion pa otro aña y ya caba nos a cuminza cu e preparacionnan, pa asina nos por incrementa e cantidad y traha hunto cu Charlene y FDA pa asina nos por crea un impacto mas grandi, segun Sydow.