Segun señor Diego de Cuba di Sindicato SPA:
ORANJESTAD (AAN): “Nos aeropuerto ta un desaster.” Asina señor Diego de Cuba, presidente di Sindicato SPA, a describi e situacion actual den maneho di Triple A. Segun e, tin personanan den posicionnan di maneho cu, lamentablemente, no ta sirbi, specialmente den departamento di siguridad.
Señor de Cuba a indica cu recientemente SPA a reuni cu CEO Jonny Andersen pa discuti 30 punto cu trahadornan a entrega na e sindicato. “Ta imposibel pero den opinion di SPA, den Triple A tin conspiracion y persecucion structura. Anto nos sa ken e hendenan aki ta y nos kier divulga e nombernan na e CEO nobo aki”, el a expresa.
Segun de Cuba, den departamento di siguridad tin formacion di cartel. El a menciona un caso den cual un oficial di siguridad den liderazgo a wordo defendi despues di acusacion di ‘sexual harassment’, mientras cu den pasado otro empleadonan a wordo retira pa motibonan similar.
“Esaki ta consecuencia ora cierto hendenan ta nombra cierto hendenan cu niun clase di experiencia den posicionnan asina importante den e compania. Y ora cu e baca hoga, nan kier bay dempel e pos”, el a expresa.
Durante e reunion cu Andersen, SPA a enfatisa cu sin un “limpiesa” interno, e problemanan lo sigui ripiti. Andersen posteriormente a presenta un structura nobo pa reunionnan, pero segun de Cuba, e propuesta ta contradici e contracto colectivo di STA y ta limita e bos di sindicato y di delegadonan operacional.
“Nos ta cansa y harta di dictadura den Triple A”, el a expresa mientras tambe a referi na un reorganizacion den 2004, ora 82 trahador a wordo manda cas. E mesun persona cu tabata e onder director di Triple A e tempo ey, a elimina ful un departamento tecnico y despues introduci un compania priva pa tuma e trabaonan. Despues di problema di e compania na Trinidad y Tobago, nan a cambia nomber di e compania y e compania a keda y e mesun persona aki a bira e onder-director.
“Esakinan ta e sushedadnan cu tabata sosode den Triple A y ainda ta sosode conspiracion y persecucionnan na unda a corta cabes di hopi trahado hasta probechando di e periodo di pandemia. Esaki mi ta haya ta sinberguensa pa uza e periodo aki pa haci fechoria pa manda hopi mama y tata di famia cas”, el a expresa.
Segun de Cuba, SPA tin prueba cu e persecucionnan tabata wordo organiza y orkestra pa diferente persona. “No tabata tin chens pa scapa una bes cu nan mik riba bo. Tardi of tempran nan lo mata bo. Pasobra asina aki nan forma di traha ta. Si nan no por elimina un persona di un forma, nan lo busca un otro forma pa elimin’e”, el a expresa.
Na final, de Cuba a enfatisa cu conspiracion y persecucion den un compania manera Triple A no ta aceptabel. Pa cua motibo tambe SPA a solicita e reunion cu CEO Jonny Andersen hunto cu board di STA pa presenta e frustracionnan y e situacionnan cu ta andando den e compania.
