Relato anual a keda publica
ORANJESTAD (AAN): Den su relato anual di 2025, Corte Comun di Husticia (Corte) ta reflexiona riba un aña den cual a enfoca riba inovacion, fortalecemento y profesionalisacion. Na tur sede (Aruba, Corsou, St. Maarten y Bonaire, St. Eustatius y Saba) a traha intensivamente pa mehora e calidad di administracion di husticia, pa modernisa procesonan, y pa fortalece e organisacion den su totalidad.
E relato ta clasifica e aña 2025 como un aña di transicion importante. A duna forma concreto na escogencianan strategico di añanan anterior, y e implementacion di e plan multianual 2025–2028 a cuminsa visiblemente. E desaroyonan dentro di Corte tawata amplio: di optimalisacion di proceso te na digitalisacion. A mehora e accesibilidad di administracion di husticia, entre otro facilitando acceso digital na proceduranan di casacion y mehorando e procesonan di publicacion.
Banda di esaki, a inverti den personal, infrastructura di IT y integridad. Durante e aña, Corte a enfrenta un cambio administrativo tambe pa motibo di e salida prematuro di Presidente Mauritsz de Kort, kende a keda nombra Gobernador di Corsou. A tuma pasonan importante bao di su presidencia cu ta forma e fundeshi pa e desaroyonan actual.
Na mes momento, Corte ta mirando pa dilanti. E proximo añanan lo ta dedica na profundisacion di procesonan di mehoracion inicia, pa yega na un administracion di husticia moderno y prepara pa futuro. Den e marco ey, e obhetivonan strategico pa e periodo 2025–2028 ta sirbi como compas. Pa medio di proyectonan interconecta den e areanan di calidad, digitalisacion, desaroyo di HR y maneho operacional, Corte ta construyendo un organisacion agil, transparente y sostenibel.
A adopta e relato anual y e cuenta anual 2025 na tempo, y auditor a emiti un declaracion aprobatorio. E cuenta anual ta cera cu un resultado practicamente neutral di -13.000 Florin, cual resultado ta keda cobra na e reserva general di acuerdo cu e regulacionnan legal. Ta parce cu, despues di dos aña di dificultad financiero, a drenta e caminda pa recuperacion y reconstruccion continua.
Esnan cu kier lesa e relato anual, por bay na e website aki:
Cu e relato anual aki, Corte ta duna un resumen cla di e desaroyonan, resultadonan y retonan principal di 2025, y ta mustra di ki manera ta implementando cambionan social, tecnologico y organisatorio den e organisacion.
