De Schatkist Peuterschool en Na Schoolse Opvang  realiza su tremendo “Proyecto Familiar 2026”

Den conexion cu nos Dia Nacional Himno y Bandera:

ORANJESTAD (AAN)-- Dialuna 16 di Maart, De Schatkist Peuterschool en Na Schoolse Opvang, a organiza un evento familiar. Juffrouw Tuti a splica DIARIO, di kico esaki a consisti.

“Esaki a hiba e nomber ‘Proyecto Familiar 2026’. Esaki ta un proyecto cu anualmente ta wordo organiza, y e tin e meta di asina aki, involucra mayornan den e desaroyo di nan yiu. Y ki mas bunita cu den e temporada di Himno y Bandera, unda nos ta celebrando nos Dia Nacional.

E proyecto e aña aki a consisti cu nos muchanan a haya un blachi di Juffrouw di e bandera di Aruba, y nan ta bay cu ne y conhuntamente cu nan famia, pensa con ta bay decora esaki”, Juffrouw Tuti a splica. El a expresa cu “the sky is the limit”, y cu nan por a uza piedra, crepe paper, trah’e den forma di stenchi, santo di lama, pero idea ta pa peg’e den un formato mas fuerte cu por colga of para riba su mes.

Cu hopi orguyo Juffrouw Tuti a comenta cu e muchanan hunto cu nan famia a traha riba e proyecto pa casi dos siman y nan a keda cla. Dialuna tabata e fecha pa e wordo presenta y e resultado tabata asina creativo y bunita, cu Juffrouw Tuti a keda asina contento cu e resultado, hunto cu e team di De Schatkist.

Durante e dia mayornan por a pa scol pa wak, observa y admira e proyectonan cu nan yiunan a realiza hunto cu nan, en conexion di Dia di Himno y Bandera. Riba combinacion di potret por mira e bunita proyecto aki, hopi creativo, colorido, y traha cu hopi curazon pa Aruba y nos Dia Nacional Himno y Bandera.

Juffrouw Tuti y full e team di De Schatkist ta contento cu tur e tesoronan cu a particia. Categoria 1: Kyomi, Categoria 2: Jillienne, Categoria 3: Amora.