Dande a pasa bishita Maria Goretti College riba prome dia di scol

ORANJESTAD (AAN): Diaranson riba e prome dia di scol pa aña 2026, tanto e docente- y alumnonan di e scol basico Maria Goretti College na Paradera a ricibi bendicion di Dande.

   E Dande aki a yega riba su trailer cu speaker, danki na Go Cultura Foundation.  Nan a para na rand di e cura di scol, y asina a canta Dande culmina cu bendicion pa e alunnonan, y tambe e maestronan.

   E tabata algo cu a cay hopi na agrado di e hobennan cu ta haya chens di sinti e vibracion fuerte di musica di Dande pa asina alegra nan dia.  Esnan di Go Cultura Foundation ta hopi contento cu e bon recepcion na e scol aki.  Nan ta manda ainda tur mihor deseo pa e aña escolar aki na esnan di Maria Goretti College.