George Winterdaal di GLW Foundation:
ORANJESTAD (AAN): Pa di 11 biaha GLW Foundation ta organiza nan evento ‘Cupcake di Speranza’ pa recauda fondo pa yuda mas hende cu nan por yuda. George Winterdaal di e fundacion den un entrevista cu DIARIO a splica cu e aña aki e fondo lo bay na Pasadiya Briyo di Solo cu lo yuda nan realisa nan soño pa completa nan Cas di Te (Tea House). E intencion ta pa ciudadanonan no solamente pasa cerca nan pa cumpra te pa hiba pero tambe pa sinta y desfruta bebiendo un te y come un cuki.
Pa esaki, señor Winterdaal a indica, Pasadiya Briyo di Solo mester di minimo Awg.5000,- pa caba cu e bunita proyecto aki. Esaki tambe ta e meta di GLW Foundation, pa yega na e suma aki, cu e cooperacion di pueblo di Aruba. Pa logra esaki, nan mester bende por lo menos 2000 cupcake pa cubri gasto y entrega e resto na Pasadiya Briyo di Solo.
Pa pedido, por tuma contacto cu señor Winterdaal na telefoon 561-6151 of na pagina di Facebook. E minimo ta un dozijn di cupcakes na balor di 60 Florin y por cumpra cuanto dozijn cu ta desea. E fundacion mes ta entrega e cupcakes te na porta di cas of na trabao, sea pa cliente of trahadornan, riba dianan 13 y 14 di februari. Net bon pa dia di amor y amistad. Tambe por entrega un dia prome y tambe por pasa busca personalmente cerca señor Winterdaal.
