Crocodil di Bonaire identifica oficialmente como ‘American Crocodile’ a muri

E ta un reptil relativamente jong

KRALENDIJK: Tabata un alivio grandi pa Pueblo di Bonaire, ora cu e informe a circula cu e Crocodil cu tabata scondi pa como 18 dia den area di beach di Sorobon y tambe Lac Baai, porfin a wordo captura.

   Lamentablemente, dialuna a drenta confirmacion cu e Crocodil a fayece dialuna mainta. Aparentemente e veterinario a bay check e condicion di e Crocodil, pero ya su situacion tabata delicado. Segun prensa local, probablemente stress por ta e causa di morto.

     Riba e potret aki pa cortesia di Gobierno di Bonaire, por mira e Crocodil cu a wordo transporta temporalmente den un lugar safe unda e por a haya alimento, y no por huy pa ningun caminda.

   Tabata Diamars 8 di October 2024 cu a bati alarma, ora cu pa prome biaha a mira, y graba riba video e Crocodil aki ta move den lama na Sorobon.  Di e dia ey pueblo a bay riba alerta, y autoridadnan maximo na e isla, principalmente Gezaghebber a tuma decision pa prohibi hende di drenta Sorobon.  Tambe a pone e organizacion Stinapa keda encarga pa yuda busca y captura e reptil.

   Pa como 2 siman y mey, e Crocodil a manera bay sconde, y de vez en cuando a spot esaki pero despues nada mas.

   Finalmente den anochi di Diasabra 26 di October 2024, durante un rond di control den e palonan di mangrove, e Rangernan di Stinapa a logra captura e crocodil.

   Unavez cu a capture, por a haci analisis di su curpa, su forma di cabez, y detaye di tur aspecto, incluyendo e rabo.

   A base di esaki, a conclui oficialmente cu ta trata aki di un reptil di especie ‘American Crocodile’.  E ta un macho di 2,34 meter largo.

   Stinapa a indica cu nan ta sigur cu ta trata aki di un solo Crocodil, pero como precaucion e proximo dianan aki Stinapa lo sigui haci control pa exclui cu lo por tin un otro Crocodil den e area.

   Con a captura e Crocodil: Riba Diabierna for di den dia caba a cuminsa usa un strategia cu e meta pa captura e reptil.  Un grupo di persona di e isla cu ta cu Stinapa, tabata mira cu nan mes ta subi den boto cu e pensamento cu nan como Boneriano mes por bay captura e reptil, aunke e ta un animal cu nunca antes nan a yega di atende.  Casi nan a captur’e riba Diabierna na Sorobon, pero algo a bay malo y nan no a logra.

   Riba Diasabra nan tabatin mucho mas animo, y a bay move cerca di e mangrove mas decidido cu nunca.  Nan a busca un ex-miembro di Stinapa, esta Karel pasobra e conoce Lac hopi bon.

   E dia ey nan a traha strategia y e grupo den boto a adapta nan mes na e forma cu e Crocodil ta move.  E Crocodil tambe a bay sconde na e parti pariba di Lac den e mangelnan.  Despues di un rato, a mire reptil den e parti pabao.  Pues atrobe a mobiliza den su direccion.  A prepara y a pone reda y lage atras.  Despues cu nan a come almuerzo, a bolbe subi boto pa bay check si acaso e reda por a gara algo.

   Aki ta usa boto y tambe kayak.  Kayak ta principalmente pa yega cerca di e mangrove.

   Asina a bin haye, y e ranger Christopher a logra pone laso rond di dje y keda want’e.  A core pidi mas yudansa, y aki ta unda cu Karel tambe a mobiliza eynan.  Mas ranger di Stinapa a yega, y subi kayak pa yega na e mangrove.

   Hunto nan a logra trece e Crocodil pa tera, y un potret cu a circula rond ta di Karel ta poniendo Duct-Tape rond di e boca di e Crocodil.  Pa nan ta importante cu nan a logra di saca e Crocodil for di awa, pa alivio di comunidad y piscadornan di e area.