Crisis Management Office ta keda vigila e situacion pa e dianan cu ta bin

E situacion di tempo pa Diabierna a keda bastante stabil

ORANJESTAD (AAN): Diabierna atardi Crisis Management Office Aruba (CMO) a tene un conferencia di prensa extraordinario pa papia riba e situacion di tempo riba nos isla, mirando e problemanan cu e awacero torencial di Diahuebs a causa varios caminda.

Durante e conferencia di prensa David Bakmeyer di Meteo a indica cu trempan tabata tin indicacionnan cu posiblemente Aruba lo ricibi un yobida fuerte manera Diahuebs.

Sinembargo, den curso di merdia cos a cambia y e yobida cu a wordo spera no a yega mas.

Rodney Tromp tambe di Meteo a añadi cu e atmosfera rond di nos isla ainda ta bastante humedo y basta instabil, cu ta pone cu ainda nos isla por haya formacion di nubia manera cu tabata e caso ayera.

“Nos tin cu pone tambe cu hopi area ta basta satura caba y esaki ta pone cu un tiki awacero mes por causa ‘flash flooding”.

Pesey nos ta keda monitor e situacion, segun Tromp.

El a sigui bisa cu Venezuela tin basta actividad, mientras cu riba satellite por wak cu tin un sistema frontal yegando.

Alrededor di Diadomingo Aruba por sinti e efectonan di e ‘front.

Rino Hermans di CMO a indica cu na momento cu e situacion bira un riesgo eminente, prensa lo wordo yama pa emiti un boletin extra.

Durante e conferencia di prensa a indica cu alrededor di 40 cas mester a wordo yuda, unda cu bay pomp na e diferente adresnan, pa kita mas awa posibel.

Rode Kruis a bishita diferente persona cu a haya nan mes den situacionnan hopi fastioso debi na e awa, unda cu varios hende a perde hopi di nan articulo y pertenencianan.

Rode Kruis no tabata tin e necesidad ainda pa yuda cu por ehempel cuminda, pero si cu otro tipo di material cu e habitante di e casnan tabata tin mester di dje.