Crescenzia Biemans a elabora tocante e programa di calidad cu Bucuti & Tara Resorts ta implementa

Den e “Quality of Healthcare Conference”

*P’esey e ta dentro di e top 25 miho hotelnan na mundo 

ORANJESTAD (AAN) – Crescenzia Biemans, Chief Property Officer di Bucuti & Tara Beach Resort, ken tambe a participa den e “Quality of Healthcare Conference”, den entrevista cu DIARIO a menciona tocante su tema, cu ta e programa cu e hotel a bin ta desaroyando pa hopi aña, pa cumpli cu henter un eco-sistema pa calidad di cuido pa e huesped y pa su empleadonan.

El a papia di con Bucuti & Tara Resort, un compania local a logra di tin e mesun standardnan di cuido no solamente pa su huespednan pero tambe pa su empleadonan y pa e planeta.

“Esaki a yuda nos wordo nombra entre un di e top 25 mihor hotelnan na mundo, y tambe como e hotel mas eco-certifica na mundo. E programa ta completo y, eigenlijk, tin mas di 20 aña caba cu nos ta trahando riba dje. E ta encera tur cos, cual ta sostenibilidad, pero tambe un nivel halto di cuido y di luho pa nos huespednan, p’asina nan sinti cu nan tin un vacacion memorable pero, ademas, cu nan ta haci bon pa nos isla y pa nos planeta tambe, ora nan ta keda cu nos.

“Nos ta hopi feliz, nos ocupacion ta 97% full aña, pues esey ta mustra cu nan gusta nos programa, cu nan ta bin Aruba y ta laga algo bon atras, y esey ta loke nos kier pa un compania local, tambe”, Crescenzia a señala.

E programa aki ta nifica pa e trahadornan hopi training, hopi educacion, ta splica nan di con e hotel ta haci locual e ta  haci, y ora nan compronde nan ta hiba e enseñanzanan aki na nan bida priva, y e ta algo cu semper nan ta hopi orguyoso di dje.

Algo hopi bon ta cu e hotelnan ta siña di otro y ta comparti cu otro. Otro hotelnan ta siña di e programa di Bucuti & Tara Beach Resort, pa nan tambe implement’e. Asina Crescenzia Biemans a duna di conoce.