ORANJESTAD (AAN): Tabata dos siman pasa Diaranson cu Centro MOC di Wardacosta di Caribe Hulandes,
a ricibi informacion cu un Kitesurfer di Venezuela ta perdi, y ta trata di un influencer di social media yama Augusto Corrente di 41 aña di edad, kende a sali for Los Roques na costa di estado Falcon na Venezuela cu a tuma rumbo pa Bonaire. Pero parce cu su meta tabata pa pasa prome na islanan Las Aves prome di sigui pa Bonaire. (Na luna di Januari di e aña aki caba el a move di Venezuela te Aruba cu Kitesurfing y a yega na costa mas pariba di Aruba, y a wordo deteni door di Polis di San Nicolas).
E biaha aki, mesora unidadnan di Wardacosta a wordo alarma, y a bay move den e area pazuid di Bonaire pa yuda den buskeda.
E avion Dash-8 di Wardacosta tambe a bula pazuid di e isla, te den oranan laat di anochi uzando nan ekipo sofistica.
Asina e siguiente dianan, e accion di buskeda a sigui cu diferente unidad, e.o. e Helicopter di Wardacosta. Tambe a busca a lo largo di costa di Bonaire cu varios autoridad.
Wardacosta mes no a haya nada durante e buskeda, pero tin hendenan cu a indica cu pazuid di costa di Bonaire a bin haya e fli y e bara di e Kitesurfer, pero nada di e persona. Lama ta extremadamente bruto e dianan aki.
