Comunidad a colecta mas cu 211 ton di sushi durante Dia Nacional pa Cuida Aruba

Ban sigui cuida e isla

ORANJESTAD (AAN): Prome Minister Mike Eman a expresa nan gratitud na pueblo di Aruba pa e participacion masivo durante e campaña Dia Nacional pa Cuida Aruba, organisa pa Gobierno di Aruba. Te cu diasabra 5 or di atardi, e organisacion a registra un total di 131 container di sushi, cu un peso total di 211.62 ton.

   E cifranan aki ainda no ta inclui e sushi colecta na DOW, AWSS y Daltra. E cantidad final lo ta mas halto despues cu inclui e material colecta na e tres sitionan menciona. E reaccion grandi di comunidad a supera tur expectativa y a confirma e necesidad pa sigui organisa iniciativa similar den futuro. For di tempran mainta, famia, organisacion, team deportivo, compania y voluntario a sali den caya pa contribui na un Aruba mas limpi. Na diferente centro di coleccion riba nos isla, e containernan a yena mas lihe cu calcula, locual a crea un reto logistico adicional pa e organisacion.

   Segun Prome Minister Mike Eman, e cantidad di sushi entrega y e reaccion di comunidad ta mustra cu e campaña a atende un necesidad real den comunidad. “E campaña aki ta un exito grandi. E containernan a yena hopi mas trempan cu nos a calcula y esaki a pone presion adicional riba e organisacion. Sinembargo, tur hende a coopera y awe nos por bisa cu e mision a cumpli. Na pueblo di Aruba: un danki grandi pa responde na e yamada y contribui na un Aruba mas limpi,” Prome Minister Eman a declara. Prome mandatario a expresa un palabra special di gratitud na Aruba Ports Authority pa pone un sitio accesibel disponibel, patrocina e containernan y sostene e organisacion di e campaña. Gobierno a haya apoyo tambe di diferente compania di utilidad, instancia publico y sector priva cu a pone container, transporte, personal y otro recurso disponibel.

   Director di APA Marc Figaroa a indica cu e operacion a cuminsa 7 or di mainta y cu ya na momento cu e portonnan a habri tabatin fila. E teamnan logistico a traha continuamente pa coordina e entrada di vehiculo, descarga di sushi y transporte di e containernan pa EcoTech. “Siguramente esaki tabata un dia exitoso. Aruba a responde masivamente na e yamada y e demanda ta cla. Esaki ta un bon cuminsamento y ta algo cu nos mester sigui sostene,” director Figaroa a expresa. Ademas di coleccion di sushi, Gobierno a combina esfuerzo cu DOW y diferente partner pa duna atencion special na varios sitio publico. E meta ta pa limpia y recupera e areanan aki pa nan por bolbe sirbi como espacio di recreacion y deporte pa comunidad.

   Mas  un docena di compania a uni esfuerzo pa contribui na e dia. Diferente team deportivo, contratista, instancia publico y grupo di boluntario tambe a participa na varios sitio riba nos isla.

   Minister Wendrick Cicilia a felicita pueblo Arubiano pa e manera cu comunidad a sali for di cas y a tuma accion. Segun e minister, e participacion ta un muestra cla cu cambio ta cuminsa cu liderazgo y cu cada ciudadano por contribui na bienestar di nos pais.

   “Si nos kier cambia e perspectiva, nos mester cuminsa cu accion y duna e bon ehempel. Awe Gobierno, sector priva y comunidad a uni esfuerzo den un proyecto concreto pa un Aruba mas limpi,” Minister Cicilia a declara. Gobierno di Aruba lo haci un evaluacion amplio di e jornada pa analiza e retonan logistico, identifica puntonan di mehora y prepara miho pa un siguiente edicion. Segun Prome Minister Eman, e resultado a comproba cu tin necesidad no solamente pa un edicion mas, pero pa diferente edicion adicional.

   Gobierno di Aruba ta expresa su gratitud na Aruba Ports Authority, Serlimar, DOW, AWSS, SETAR, Post Aruba, EcoTech, CMO, e ekipo di Ministerio di Asunto General, BCI, DNM y varios medio di comunicacion. Pero e danki mas grandi ta bay na pueblo di Aruba, cu a responde masivamente na e yamada y cu su participacion a haci e campaña aki un exito. Gobierno ta sigui comprometi pa traha hunto cu comunidad y sector priva pa un Aruba mas limpi, saludabel y sostenibel.