Como 8 di cada 10 mucha na Aruba ta experiencia abuso den nan bida

Investigacion revelador di Clementia Eugene di Universidad

ORANJESTAD (AAN): Señora Clementia Eugene ta Interim Program Manager di Departamento di Trabao y Desaroyo Social (Department of Social Work and Development) na Universidad di Aruba.

   Luna pasa net riba Dia Internacional di Famia, Señora Eugene a presenta na Minister di Enseñanza y Deporte Sr. Endy Croes, Minister di Asunto Social y Husticia Sr. Rocco Tjon y directora di Departamento di Asunto Social Señora Rosanna van Dijk e resultadonan di su investigacion titula: Child Maltreatment Prevalence Rate in Aruba.

   Señora Eugene a informa cu e resultadonan di e estudio ta revela un promedio di abuso a lo largo di bida di 78.4%. Esaki ta nifica cu 8 di cada 10 mucha na Aruba ta experiencia abuso den nan bida. Tambe, e resultado a indica cu mas mucha muhe ta experiencia abuso cu mucha homber.

   Durante e presentacion, Señora Eugene a duna Gobierno di Aruba diferente recomendacion cu por aplica pa garantisa proteccion, sobrevivencia, evolucion di capacidad humano y florecemento di mucha. Un di e recomendacionnan cu a duna ta pa tin trahado social na tur scol di Aruba, cuminsando den scol preparatorio.

   A recomenda pa incorpora Codigo di Proteccion y Señal di Siguridad na Instituto Pedagogico Arubano (IPA), den Programa di Trabao Social (Social Work Programs) na EPI y Universidad di Aruba. Minister Endy Croes ta felicita Señora Eugene cu e investigacion amplio cu el a haci encuanto abuso di mucha. Esaki sigur lo contribui na e maneho y lo yuda Gobierno di Aruba momento cu mester tuma decisionnan esencial.

   Tur esnan cu ta desea di haya un copia di e resumen di e investigacion na Hulandes, Ingles, Spaño of Papiamento por mail Señora Eugene na Cette adresse e-mail est protégée contre les robots spammeurs. Vous devez activer le JavaScript pour la visualiser. pa ricibi un copia.