Cobransa belasting y menos entrada di trahadornan ta herida Comercio --- *Destruccion politico di e base financiero a bira ultrahe pa pais ---*Medidanan pa paga debe den culminacion di crisis comercial
ORANJESTAD (AAN) — “E situacion cu a desaroya durante ultimo decada, no ta un sorpresa pa Comercio, cu semper a urgi politiconan pa hiba un maneho financiero sano. “
Na palabra informantenan di sector comercial di Aruba, cu a mustra cu e situacion mundial economico cu a afecta comercio local, a percura pa culminacion di desaroyonan pa cual comercio local a adverti na tanto ocasion.
“E problemanan internacional di produccion y gastonan cu ta sigui crece pa transportacion ta conoci pa comunidad cu comercio a tene na haltura di tur desaroyo,” informacion di seno comercial ta indica.
Si situacion economico y financiero di Aruba ta malo, e ta afecta Comercio y asina ta afecta trahadornan cu na un pais democratico y liber, ta depende di Comercio como dunador di trabou mas grandi.
Cu situacion financiero di Aruba ta delicado, ta un hecho cu for di 2013 a bira evidente na momento cu Banco Central a emiti cifranan riba e debe nacional di Aruba cu tabata mes halto cu 71.2 porciento di e produccion nacional.
E debe nacional di Aruba pues for di 2013, ya tabata mas cu 11 porciento riba e debe aceptabel di Union Monetario Europeo, cu ta 60 porciento.
Na 2017 Aruba tabata tin un debe igual na 86 porciento di su produccion nacional den un situacion financiero y economico, cu a basha abou ora e proyecto Citgo cu a wordo presenta como proyecto cu lo a soluciona tur problema financiero y economico di Aruba, manera a wordo adverti dor di expertonan mundial, a tranca.
Comercio directamente a bira victima di e situacion hunto Pueblo di Aruba, cu pa un gran parti a hinca su mes den debe grandi en espera di e proyecto Citgo.
Na 2018, directamente despues di cambio di Gobierno, medidanan importante a wordo introduci y proyecto Citgo a wordo gescrap.
“Futuro di Aruba a spart for di otro for di 2017 na momento cu incertidumbre riba economia y finanzas a bira realidad,” informantenan a indica.
Na e momento tambe, ciudadanonan y companianan a haci debe cu nan mester a paga na momento cu medidanan financiero tambe a bira realidad pasobra Aruba a resulta di ta den un situacion financiero deplorabel.
Na 2018 medidanan pa atende cu e crisis financiero di Aruba a wordo tuma.
“Trahadornan cu ta gasta placa den comercio, mester a baha nan gastonan mescos cu comerciantenan,” a bini dilanti.
Na 2020, comercio a enfrenta e pio momento di su historia ora mester a cera comercio y sin asistencia financiero di Gobierno, Comercio lo no a sobrebibi.
No ta Gobierno so, pero den Comercio y na otro instancianan cu ta tuma personal, a reduci nan cantidad di personal.
Omicron, Guera di Ukraine a presenta y e situacion financiero mundial, di cual Aruba ta depende a sigui bay atras.
Awe den un situacion sumamente dificil, Aruba mester tuma medida pa por sigui cana den futuro.
“Esaki ta e momento pa cual a adverti gobernacion semper y a mustra riba un bon gobernacion financiero,” a wordo indica.
Medidanan financiero di un pais ta exigi pa debenan di belasting wordo paga y awe den e situacion di crisis riba crisis, comercio y trahadornan mester paga belasting, debe atrasa di belasting den espera di e medidanan final cu Reino.
“Awe e situacion cu tabata bisto for di 2013 y pa cual gremionan a adverti, ta rementa den man di Comercio y trahadornan cu mester paga belasting, loke ta exigi Comercio pa ta cauteloso cu gastonan, loke ta nifica cu gastonan di personal den Comercio tambe mester ta controla y loke asina ta afecta e cantidad di personal cu mester wordo emplea y e salarionan cu por ofrece,” informantenan ta indica.
E circulo ta cera ora indica cu ta e trahadornan mester bay gasta placa y asina sostene comercio local hunto cu turistanan cu den e situacion mundial, tambe conoce e problema di inflacion.
“Awe e debe cu Gobierno a crea ta menasa trahadornan y Comercio,” a wordo indica.
DIARIO ta sigui investiga e situacion economico y financiero na Aruba, cu sigur ta pasa den uno di su momentonan mas dificil.
