Cifranan forensico ta mustra cu dalmento di auto a aumenta 50% e prome siman di Januari

Thomas Ruiz di VRA preocupa:

ORANJESTAD (AAN) Siguiendo cu e entrevista cu Matutino DIARIO a haci cu señor Thomas Ruiz, di Vereniging Rijscholen Aruba (VRA), el a mustra di ta di acuerdo pa pone camera tambe, pa controla e trafico.

Señor Ruiz a indica cu via camera por wak si tin algo iregular a tuma lugar, of un accidente y e ora ey por manda e team necesario na e lugar, pero nan no ta manera un flitspaal.

“Manera mi a bisa nan caba mester bin cu un flitspaal, pa por regula e bendito velocidad cu ta demasiado halto akinan. Nos ta coriendo demasiado duro, y esey nos tur ta wak’e”, el a señala.

 “Na Hulanda mes nan ta uza e flitspaal, cu ta duna cuanto bo ta core, si bo ta core di mas, si bo tin safetybelt bisti. Kiermen e tecnologia ta avanzando pero nos ta keda atras”, señor Ruiz a indica.

Thomas Ruiz a referi na e cifranan forensico cu a wordo publica recientemente.

“E cifranan aki ta mustra cu e prome siman di Januari tabata tin 50% aumento di dalmento. Nos tin cu haci algo, nos no por keda cu man cruza.

Nos ta expect cu nos ta bay sinta mas lihe posible hunto cu Minister y otro stakeholders, pa nos por dialoga tocante cambio di maneho, y implementa esaki, y nos ta spera cu e duna e fruta cu nos ta desea”, Señor Ruiz a expresa.

El a agrega cu esnan di parti di educacion tambe tin cu haci hopi.

“Mester regula e rijscholen, mester independiza e departamento di rijbewijs, y revisa e curriculum cu nos ta duna como examen. Te ainda VRA no tin ni un dato cu e curriculum aki ta duna resultado”,  Ruiz a señala.

El a agrega cu esaki ta un problema cu mester cu mester wordo acapara di tur banda, no di Minister so, sino di Minister, Parlamento, Departamento di Transporte Publico, etc., y tambe di e mesun barionan. “Centronan di bario mester ta mas activo; bin cu anochinan informativo, invita nos di VRA, por ehemplo, hunto cu polis y Brandweer, pa nos educa nos pueblo tocante e situacion di trafico cu ta caotico y preocupante”, señor Thomas Ruiz a remarca.